Qırım advokatı Mammet Mambetov, Aqmescit tahqiqat izolâtorında (SİZO) Aqmescitteki «Hizb ut-Tahrir işi» figurantı Uzeir Abdullayevni ziyaret etip, sağlığınıñ eyilişmesi aqqında bildirdi. Bunı advokat mayıs 7-de özüniñ Facebooktaki saifesinde yazdı.
Mambetov: «Bugün Aqmescit SİZOsında daa bir kere Uzeir Abdullayevni ziyaret ettim. Bu sefer onıñ sağlığı, mayıs 3-tekinen qıyas etilgende, daa yahşı. Ayağındaki şişik yavaş-yavaş keçip başladı. Uzeir, pervasız olmağanları içün er keske minnetdarlığını bildirdi ve büyükten büyük selâm yolladı», – dedi.
Onıñ aytqanına köre, Abdullayevde sağlıq vaziyetiniñ eyileşmesi, oña tibbiy yardımnıñ kösterilmesi ile iç de bağlı degil.
Advokat: «Onı ale daa keregi kibi teşkermediler. Oña, SİZOdan eki saatqa çıqarılğanda yapılğan ultra-davuş teşkerilüvi – teşkerilüv degil. Uzeirde endi ardı-sıra üç aydan berli ayda bir kere olaraq böyle tutuvlar ola. Lâkin kimse oña, damarından biohimiyağa qan alıp lütuf köstermedi. Ya ekimlerniñ bu meselede salâhiyeti yoq, ya da olar ondan bu hastalığını gizleyler. Amma öz sağlığınıñ vaziyeti aqqında doğrusını bilmek – bu, er bir, hususan esirlikte olğan insannıñ aqqıdır», – dep qayd etti.
Mayıs 4 cuma künü, Aqmescit tahqiqat izolâtorında tutulğan Aqmescitteki «Hizb ut-Tahrir işi» figurantı Uzeir Abdullayevni Semaşko adına hastahanege alıp barğanları aqqında malümat peyda oldı.
Bunıñ arfesinde advokat Mammet Mambetov, Abdullayevniñ kritik vaziyeti aqqında bildirdi.
Aprel 30-da Uzeir Abdullayev Aqmescitteki tahqiqat izolâtorınıñ tibbiy bölügine keçirildi. Bundan evel Abdullayevniñ anası Dilâra Abdullayeva, oğlunıñ bir qaç künden berli yüksek sıcağı ve ayağında şişik ile şişiklik olıp, dayanılmaz ağrılar çekkenini bildirdi.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
