Tahqiqat izolâtorında (SİZOda) bulunğan Aqmescitteki «Hizb ut-Tahrir işi» figurantı Uzeir Abdullayevde bir qaç künden berli yüksek sıcağı bar, sol ayağı tizine qadar şişti, qızarğan şişiklik ve dayanamaz ağrılar bar. Anası, Dilâra Abdullayevanıñ bildirgenine köre, bu alâmetler qannıñ zeerlenmesine işaret etmek mümkünler.
Bunı o, özüniñ Facebook saifesinde yazdı.
Abdullayeva: «SİZOnıñ kirişi yanında bekleyim. Tsivil urbada bir erkek kele, ve oña birden qapını açalar. Men birden oña muracaat etem ve rehberge ketse, oña men – işi tergevcide baqılğan Uzeir (Abdullayev – AQ)niñ anası olğanımnı, ve ortada oğlumnıñ yaşam ve ölüm meselesinñ turğanını aytıp bermekni rica etem. Tek bir şey isteyim – oğlumnı hastahanege yatqızılmasını…», – dep yazdı.
Onıñ aytqanına köre, tevqif etilgen oğlu vaziyetiniñ ciddiyligini bilmemek mümkün degil.
Abdullayeva: «General yarım saattan soñ (SİZOnıñ – QA) rehberi ile çıqtı. Olar Uzeirniñ, ayağını basıp bile olamağanına şahsen özleri qandı. Klinika ile añlaşacaqlarını, hastahanege yatqızacaqlarını, amma bayramlardan soñ, şimdi ise ine ile antibiotikler ve sıcaqnı tüşürgen ilâclar bereler, dediler. Men, tekrar-tekrar, er bir daqiqa muim desem de… O, maña, buyruq bergenini: vaziyeti fenalaşsa – hastahanege yatqızacaqlarını söyledi», – dep bildire.
Tahqiqat izolâtorınıñ hadimleri tarafından açıq menbalarda bu hususta izaatlar berilmedi.
Daa evel Uzeir Abdullayevniñ advokatı ve apayı yaqın vaqıtta Cezalarnı içra etüv federal hizmetiniñ idaresi (UFSİN), tahqiqat izolâtorı, prokuratura ve FSBge, tsivil hastahanede uyğun tibbiy yardımnıñ kösterilmesini temin etsinler ve qabaatlanğanğa diagnozını bildirsinler dep, bir sıra arizalar bereceklerini bildirdiler.
Bundan evel Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnıñ qorçalayıcıları tarafından sıñırlav tedbiriniñ uzatılmasına qarşı berilgen apellâtsiyalarnı red etti.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
