Aqmescit tahqiqat izolâtorında (SİZO) tutulğan Aqmescitteki «Hizb ut-Tahrir işi» figurantı Uzeir Abdullayevni Semaşko adına hastahanege alıp bardılar. «Qırım birdemligi» birleşmesiniñ, Abdullayevniñ anasına atıfta bulunaraq Facebooktaki saifesinde bildirgenine köre, o, kritik vaziyette buluna.
Bildirüvde: «SİZOnıñ memuriyeti, acele surette hastahanege yatqızmaq kerekligine dair bütün tibbiy kösterişlerge emiyet bermeyip, Uzeir Abdullayevni bugünge (mayıs 4-ke – QA) qadar SİZOnıñ territoriyasında tutmağa devam etti», – denile.
Qırım.Aqiqatnıñ, işten haberdar menbadan alğan malümatına köre, Uzeir Abdullayev hastahanede teşkerildi, oña ultra-davuş teşkerilüvi yapıldı, trombnıñ peyda oluv imkânı red etildi. Ekimler, damar hastalığınıñ olmağanını işandırdı. Şimdi Abdullayevni tahqiqat izolâtorına qaytardılar.
Qırım advokatı Edem Semedlâyev, Abdullayevniñ bulunğan yeri aqqında resmiy malümatnıñ olmağanını izalarken, Qırım.Aqiqatqa, tahqiqat izolâtorınıñ hadimleri aqrabalardan malümatnı gizlemek mümkünler, dedi. Semedlâyev: «O, hastahanede olsa, olar bunı soñuna qadar gizleycekler», – dedi.
Bunıñ arfesinde advokat Mammet Mambetov, Abdullayevniñ kritik vaziyeti aqqında bildirdi.
Aprel 30-da Uzeir Abdullayev Aqmescitteki tahqiqat izolâtorınıñ tibbiy bölügine keçirildi. Bundan evel Abdullayevniñ anası Dilâra Abdullayeva, oğlunıñ bir qaç künden berli yüksek sıcağı ve ayağında şişik ile şişiklik olıp, dayanılmaz ağrılar çekkenini bildirdi.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesinde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni yasaq etip, «terroristik» tanılğan 15 birleşmeniñ cedveline kirsetti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
