Rusiye prezidenti Vladimir Putinniñ işğal etilgen Qırımdan arbiy tehnikanı qaytarmaq teklifi halqara garantiyalar ile tasdiqlanmağance Ukraina akimiyeti onı qabul etmemeli. Ukraina Arbiy deñiz quvetleriniñ 2014-2016 senelerdeki komandanı Serhiy Hayduk bu fikirni Qırım.Aqiqat Radiosınıñ canlı yayınında bildirdi.
Hayduk: «Rusiye tarafı işançsız olğanını endi çoq kere tasdiqları. Ukraina ise ilhaq esnasında marum qalğan mal-mülkü boyunca halqara maqamlarda davalar açtı – bu eñ muimidir. Asılında, bu tehnikanıñ modernlerştirilmesi ve utilizatsiyası içün ne qadar para kerek olacaq, bunı kim yapacaq, yedek parçalar qaydan alınacaq, azır mutehassıslar barmı ve diger meselelerni ögrenmek kerek. Lâkin, er alda, yalıñız halqara seviyede uquqiy ceetten esaslandırılğan açıq-aydın garantiyalar berilgen soñ qaytaruv aqqında ciddiy surette qonuşmaq mümkün olacaq», – dedi.
Daa evel Hayduk, Qırım.Aqiqat içün bergen izaatta, Kyiv ilhaq etilgen Qırımdan Ukrainanıñ arbiy tehnikası qatarılmadan evel oña maliy-iqtisadiy ceetten qıymet kesmek kerek, dep bildirdi.
Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini bildirgen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
