Ukraina Arbiy deñiz quvetleriniñ sabıq komandanı, vitse-admiral Serhiy Hayduk, ilhaq etilgen Qırımdan Ukrainanıñ arbiy tehnikası qaytarılmazdan evel onıñ maliy-iqtisadiy qıymeti kesilmek kerek, dep tüşüne. Bu fikirni Hayduk yanvarniñ 12-sinde Qırım.Aqiqat içün bergen izaatlarda bildirdi.
Eñ esası, teren maliy-iqtisadiy qıymet kesüv yapılmaq kerek. Anda bulunğan tehnikanıñ qalımtı qıymeti miqdarı ne derecede adekvat ve o, mal-mülkniñ çalışqan alğa qaytarılması ya da modernizatsiyası içün kerek olğan paranıñ miqdarınen teñeştirile bilecekmi, baqmaq kerek.
Onıñ aytqanına köre, Qırımda bulunğan tehnika ve silânıñ 70-80%-ı Rusiyede ve ecnebiy devletlerde istisal etildi.
Sabıq Ukraina ADQ komandanı: «Bu yerde bir sual doğa: biz onı çalışqan alğa qaytarmaq içün ithalni deñiştirüv sanayılaştırımasına (importozameşçeniyege) ne derecede azırmız? Sualler cevaplardan daa çoq», – dep ilâve etti.
Serhiy Hayduk 2014 senesi martnıñ 7-sinden 2016 senesi aprelniñ 15-ne qadar Ukraina Arbiy deñiz quvetleriniñ komandanı edi. Martnıñ 2-7 künleri arasında o, ADQ komandanı vazifesini vaqtınca eda etti.
Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
