Ukraina Silâlı quvetleriniñ Arbiy deñiz quvetleri komandanı İhor Voronçenko, Qırımnıñ Rusiye tarafından ilhaqından soñ anda qalğan Ukrainanıñ arbiy tehnikası çalışqan vaziyette buluna ve Rusiye prezidenti Vladimir Putinniñ onı qaytarmaq teklifi boyunca qarar Ukrainanıñ rehberleri tarafından berilecek, dedi.
Yanvarniñ 11-nde «112 Ukraina» telekanalınıñ efirinde o: «Mesele devletniñ yuqarı arbiy-siyasiy rehberleri seviyesinde çezilecek. Lâkin, Kremlniñ kirli oyunlarında qoqla olmamaq içün biz bu meseleni yahşı etip ögrenmek kerekmiz», – dedi.
Voronçenko, İlhaqı vaqtında Qırımda 8 arbiy gemi bar edi. Olardan yalıñız bir gemi – «Olşanskıy» Büyük desant gemisi areket etmegen vaziyette edi. «Lutsk» korveti ise tamir etile edi. Böylelikle, Ukraina flotunıñ yaman vaziyeti aqqında beyanatlar kerçekke uymay.
«İnterfaks»nıñ bildirgenine köre, Ukraina Arbiy deñiz quvetleriniñ komandanı yalıdaki qısımlar aqqında aytqanda: «Anda eki BMP (Piyade askerleriniñ arbiy maşinası – QA) batalyonı ve eki BTR (Zırhlı transportör – QA) batalyonını donatmaq içün yeterli olğan tehnika, … 7 artilleriya divizionı ve 4 minomöt batareyası qaldı», – dedi.
Ondan ğayrı, Voronçenko, Qırımnıñ ilhaqı esnasında avacılıq tehnikası devletniñ qıtadaki qısmına keçirildi, dep qayd etken soñ, Ukraina ilhaq etilgen Qırım territoriyasında qalğan tehnikası boyunca halqara mahkemelerge muracaat etti, dep hatırlattı.
Yanvarnıñ 11-nde, aqşam, Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
