Ağustos 23-te Kremlniñ kontroli altında olğan Qırımnıñ Yuqarı mahkemesi terrorizmniñ propagandasında qabaatlanğan qırımtatar vatandaş jurnalisti, bloger Nariman Memedeminovğa tevqif müddetiniñ uzatılmasına qarşı imayesi tarafından berilgen apellâtsion şikâyetni red etti.
Advokat Edem Semedlâyev Qırım.Aqiqat muhbirine, o, tahqiqat izolâtorında oktâbr 15-ke qadar qalacaq, dedi.
Advokat: «Mahkeme, birinci maqam mahkemesiniñ qararını qanuniy tanıp, apellâtsion şikâyetiniñ qanaatlendirilmesini red etti. Şunıñ qayd etilmesi müimdir ki, mahkeme, bu apellâtsiyanı baqıp çıqıp, sadece adliyege riayet etkeniniñ körünişini yapa. Çünki ağustos 13-te Narimanğa tevqifni daa bir kere uzattılar», – dedi.
Mahkeme oturışuvı qapalı rejimde keçti. Lâkin qararnıñ ilân etilmesine Narimannıñ ömür arqadaşı Lemaranı ve bir qaç faaliyetçini yiberdiler. Qabaatlanğannıñ özü oturışuvda tahqiqat izolâtorından video alâqa vastasınen iştirak etti.
Nariman: «Men endi ayttım bugün: evelden meni tek yaşağan rayonımda bilseler, şimdi mahsus hizmetlerniñ «sayesinde» meni endi bütün Qırımda ve onıñ tışında bileler. Menim kibilerni yalıñız milliy ve diniy alâmetke köre taqip etkenlerini de. Böyle bir kazus», – dep qayd etti.
Mevzuğa dair: «Bizde bayram, babaçığım qaytqan soñ olacaq». Nariman Memedeminovnıñ qorantası onıñ tevqifinden soñ nasıl yaşay
Bundan evel Rusiyeniñ kontroli altında olğan Aqmescitniñ Kiyevskiy rayon mahkemesi Memedeminovğa tevqif müddetini 2 ayğa uzattı. O, tahqiqat izolâtorında oktâbr 15-ke qadar qalacaq.
Mart 22-de Bağçasaray rayonında Rusiye telükesizlik hadimleri ve uquqqoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Mart 23-te mahkeme Memedeminovnı tevqif etti.
Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
