Ukrainalı dissident, sovet lagerleriniñ sabıq mabüsi Mıroslav Marınovıç Qırımda «gaz borusındaki diversiyada» qabaatlanıp apiske alınğan qırımtatar faali ve siyasetçisi Nariman Celâlğa mektüp yazdı. Mektüpniñ metnini Facebook saifesinde Celâlnıñ ömür arqadaşı Leviza derc etti.
«Ulaşuv daa işançlı olsun dep rusça yazam, amma ukrainim, ana tilim – ukraincedir. Seniñ «Kene bütün kün kamerada. Bir şey yoq» yazğanlarını oqup, 1977 senesini hatırladım, menim kameram, ve vaqıt böyle keçken edi. Men sorğuğa ne vaqıt çağırırlar, dep sabırsızlıqnen BEKLEY edim, çünki bu bir vaqia, bir haber edi. Kezinti azbarında bir mücize kibi ösken zayıf bir fidan da aqlımda. Onı körmek menim içün ayrı bir şey edi – yañı bir kâinat körgen kibi oldım. Tasvir etilmeycek dülberlik! Amma razı olmağanlarnıñ yañı nesilleri aynı apishane kerçeklerini körer, dep beklemegen edim. Biznen er şey bitmek kerek edi, dep tüşüngen edim. Bizden soñ dünya mıtlaqa aqıllanacaq. Ne yazıq ki… Lâkin yahşılıq ve yamanlıq arasında farq ne qadar açıq olğanını da hatırlayım. Er şey açıq edi, er şey qara-beyaz edi, sen ise yahşılıq tarafında turmaq içün küçüni tapmaq kerek ediñ. Seniñ urğularıñda Seniñ de aqiqat eminligini tanıyım – Seniñ içün pek quvanam. Özüñ de bilesiñ, budır Seniñ maneviy küç menbası», – dep yazdı Marınovıç.
Onıñ qayd etkenine köre, 2012 senesi ömür arqadaşınen beraber Qırımğa qırımtatar raatlıq evine kelgen edi.
«Qırımtatar yaşayışını ve medeniyetini içinden tanımağa istedik. Şu sebepten bir çoq yerge barıp, pek yahşı insanlarnen tanıştıq. Toprağını ne qadar büyük sevginen baqqanları ayrette qaldırğan edi. Vaqıt kelir, Nariman, ve Sema epiñizge bu sevgi içün teşekkür eter!», – dep yazdı Marınovıç.
Qırımtatar siyasetçisi ve faali Nariman Celâl işğal altındaki Qırımda tahqiqat ve adliyeni «yalancı» ve «sımarlanğan» dep adlandırdı.
Yanvarniñ 25-nde Rusiye kontrolindeki Qırım Yuqarı mahkemesi Nariman Celâl, Asan ve Aziz Ahtemovlarnıñ apiske alınmasına qarşı imayeniñ istinaf şikâyetini red etti. Olar eñ az fevralniñ 23-ne qadar SİZOda qalacaq.
Advokat Nikolay Polozov Nariman Celâl «tış dünyadan ciddiy bir izolâtsiyada» tutula, dep qayd etken edi.
2021 senesi dekabrniñ 15-nde advokat Nikolay Polozovnıñ bildirgenine köre, Rusiye quvetçileri Anğara köyündeki «gaz borusında diversiya» davası boyunca ilk tahqiqatnı yekünledi, Nariman Celâlğa daa bir qabaatlav berildi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
