Ukraina alimi, dinşınas, cemaat erbabı, Rusiye qoltutqan «DNR» gruppirovkasınıñ sabıq mabüsi İgor Kozlovskiy Qırımda «gaz borusındaki diversiyada» qabaatlanıp apiske alınğan qırımtatar faali ve siyasetçisi Nariman Celâlğa açıq mektüp yazdı. Mektüpniñ metnini Kozlovskiy Facebook saifesinde derc etti.
«Qıymetli qardaşım! Bu mektüpni yüregim aytqanı kibi yazam. Bugün, 2016 senesi yanvarniñ 27-nde, meni esir alıp, aman-aman 2 yılğa «DNR» apishanesine qapattılar. Bu yalıñız menim degil, azat etilmem içün elinden kelgenini yapqan tuvğanlarım ve dostlarım içün qorqunç bir vaqıt edi. Olarnıñ ve tanış ve tanış olmağan, lâqayt qalmağan insanlarnıñ qattı ğayretleri menim içün «canlı suv» edi, olar maña küç ve yaşamaq, azatlıq semasını körmek içün bir sebep bere ediler. Olarğa daima minnetdar olacam!», – dep yazdı Kozlovskiy.
O, tek Qırımda degil, bütün Ukrainada ve onıñ tışında biñlernen insan Nariman Celâl azat etilsin dep küreşe, dep qayd etti.
«Sen eziyetlengen, amma ğururlı ve yıqılmağan halqnıñ cesüp adamısıñ! Ecdatlarını unutmağan topraqta serbest ve lâyıq yaşayış aqqında hayal etken insanlarnıñ aq ve serbestligi oğrunda küreşniñ timsali olmaq qısmetiñ oldı! Bu büyük bir mesüliyet! Başına kelgen bütün sınavlarnı keçmek içün beden, ruhiy ve maneviy küçüñ yetsin! Adaletsiz qabaatlavlar altında apisteki qıyın şaraitlerde yaşamaq pek zor, amma, eminim, yolunda rastkelgen bütün sınavlarnı lâyıq bir şekilde keçip, başını ğururnen köterip, azatlıqqa çıqacaqsıñ. Sen aqiqat oğrunda küreşmege bilesiñ ve yaqınlarını ve halqını sevesiñ. Saña ışıqnıñ qaranlıqnı yeñmesi içün ümüt energiyasını bergen yaşayışnıñ manası ola, dep işanam. Unutma, seni bekleyler, seniñ içün küreşeler ve çoq insan seni seve! Qaviy sağlıq, can raatlığı ve maneviy küç tileyim, Nariman qardaşım!», – dep aytıla Kozlovskiyniñ mektübinde.
Qırımtatar siyasetçisi ve faali Nariman Celâl işğal altındaki Qırımda tahqiqat ve adliyeni «yalancı» ve «sımarlanğan» dep adlandırdı.
Yanvarniñ 25-nde Rusiye kontrolindeki Qırım Yuqarı mahkemesi Nariman Celâl, Asan ve Aziz Ahtemovlarnıñ apiske alınmasına qarşı imayeniñ istinaf şikâyetini red etti. Olar eñ az fevralniñ 23-ne qadar SİZOda qalacaq.
Advokat Nikolay Polozov Nariman Celâl «tış dünyadan ciddiy bir izolâtsiyada» tutula, dep qayd etken edi.
2021 senesi dekabrniñ 15-nde advokat Nikolay Polozovnıñ bildirgenine köre, Rusiye quvetçileri Anğara köyündeki «gaz borusında diversiya» davası boyunca ilk tahqiqatnı yekünledi, Nariman Celâlğa daa bir qabaatlav berildi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
