«Gaz borusındaki diversiya davası» boyunca apiske alınğan qırımtatar siyasetçisi ve faali Nariman Celâl «tış dünyadan ciddiy bir izolâtsiyada» tutula. Bu aqta advokat Nikolay Polozov müvekkilinen Aqmescit SİZOsında körüşken soñ ayttı.
«Onıñ ne gazeta, ne radio, ne de televizorı bar. Bir ay içinde oña tek beş mektüp berildi (SİZOdaki tsenzorlarda ise dost, tanış ve lâqayt qalmağan insanlar yazğan onlarnen, atta yüzlernen mektüp bar). Ebet, bu akimiyet bergen vazifedir – Narimannıñ sesini bastırmaq, onı bütünley izolâtsiya etmek. O yoq kibi yapmaq», – dep bildirdi Polozov.
Advokat, soñki vaqıtları Nariman apishane kitaphanesinden çoq kitap oqudı, dep tarif etti.
Polozovnıñ malümatına köre, Celâlnıñ kamerasını qızdıruv probleması «çezildi ve qoşma olaraq qızdırğıç berildi».
«Apishane turmuşında qalğanları pek deñişmedi. Onı alâ daa pek telükeli mabüsler içün «Mahsus blokta» ve daa bir mabüsnen eki kişilik kiçik kamerada tutalar. Munasebetleri yahşı. Qabaatlayıcı qarar berilüvini bekley, soñra prokuror imzalamasını», – dep bildirdi advokat.
Rusiye apishane hadimleri Polozovnıñ aytqanlarını tefsir etmey.
Nariman Celâlnıñ apis müddeti 2022 senesi fevralniñ 23-ne qadar uzatıldı.
2021 senesi dekabrniñ 15-nde advokat Nikolay Polozovnıñ bildirgenine köre, Rusiye quvetçileri Anğara köyündeki «gaz borusında diversiya» davası boyunca ilk tahqiqatnı yekünledi, Nariman Celâlğa daa bir qabaatlav berildi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
