Qırımtatar faali Zair Smedlâ Qırımtatar halqı genotsidiniñ yıldönümi arfesinde tenbi vesiqasını bergenlerini haber etti. Vesiqanıñ kopiyasını Smedlâ Facebook saifesine yerleştirdi.
İşgal etilgen Qurmannıñ prokurorı tarafından imzalanğan vesiqada mayısnıñ 18-nde «qanun bozulmaycağı aqqında» tenbi bar.
Qırımtatar halqı genotsidiniñ yıldönümi arfesinde Qırımda Rusiye polisi qırımtatar faallerini tenbiyelemege devam ete.
Vesiqalarda «toplaşuv, miting, numayış, yürüş ve piket etüv aqqında» ve «ekstremist faaliyeti ile küreş» qanunınıñ bozulmaması aqqında tenbi bar. Haber etilgenine köre, «aktsiya iştirakçilerine betlerini qapatmağa, silâ qullanmağa ve qanun talaplarını bozmağa yasaq etile.
Mayısnıñ 14-nde Sudaqta Rusiye polisiniñ hadimleri qırımtatar faali Seytosman Karaliyevni qanun bozulmaycağı aqqında tenbiledi.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
