Qırımtatar halqı genotsidiniñ yıllığı arfesinde Qırımda Rusiye polisi qırımtatar faallerini tenbiyelemege devam ete. Bunı mayısnıñ 17-nde qırımtatar milliy areketiniñ faali Narima Celâl haber etti.
Onıñ bildirgenine köre, Rusiye polisiniñ hadimleri «qanun bozulmaycağı aqqında» qırımtatar faali Suleyman Kadırovnı tenbilegen.
Vesiqada «toplaşuv, miting, numayış, yürüş ve piket etüv aqqında» ve «ekstremist faaliyeti ile küreş» qanunınıñ bozulmaması aqqında tenbi bar. Haber etilgenine köre, «aktsiya iştirakçilerine betlerini qapatmağa, silâ qullanmağa ve qanun talaplarını bozmağa yasaq etile.
«Suleyman Kadırov separatizm sebebinden Rusiye mahkemesi tarafından mahküm etildi. Bugünde o ve bir çoq diger faal akimiyetniñ büyük bir diqqatı altındadır», – dep tefsir etti Celâl.
Mayısnıñ 14-nde Sudaqta Rusiye polisiniñ hadimleri qırımtatar faali Seytosman Karaliyevni qanun bozulmaycağı aqqında tenbiledi.
Qırımtatar faali Suleyman Kadırovğa qarşı cinaiy dava 2016 senesi oktâbr ayınıñ başında açıldı. Cinaiy dava açılmasına dair qararda Kadırov Rusiye Ceza kodeksiniñ 280.1 maddesine istinaden «Rusiye Federatsiyasınıñ topraq bütünligini bozuv areketlerine açıq çağırğanından» şübheli sayıla, dep qayd etile.
Kadırovnı taqip etmek içün Facebookta bir videonıñ altında qaldırğan tefsiri sebep oldı. Suleyman Kadırov bir şey yazmadı, dep israr ete. Bunı o, mahkeme oturışuvında da ayttı. Faqat mahkeme eki yıl şartlı ceza ve eki yıl cemaat faaliyetinen oğraşuv yasağı şeklinde qabaatlav qararını çıqardı. 2020 senesiniñ soñunda Rusiye Ceza kodeksiniñ 280.1 maddesi qısmen deñişti. Artıq insan aynı uquq bozuluvı sebebinden soñki yılda memuriy mesülietke çekilgen olsa, o vaqıt cinaiy mesüliyet ola.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
