Sudaqta Rusiye polisiniñ hadimleri qırımtatar faali Seytosman Karaliyevni qanun bozulmaycağı aqqında tenbiledi, dep bildire mayısnıñ 14-nde «Qırım birdemligi» cemaat birleşmesi.
Qayd etilgenine köre, quvetçiler faalniñ evine keldi. Karaliyevniñ aytqanına köre, olar şeadetnamelerini köstermedi, aqlarını añlatmadı ve qırımtatarcadan tercimannı teklif etmedi. Erkekniñ aytqanına köre, polis onı kamerağa çıqardı.
«Qırımnıñ İç işler nazirligi imzalağan vesiqada «Toplaşuv, miting, numayış, yürüş ve piket etüv» federal qanunı ve «Ekstremist faaliyeti ile küreş» qanunınıñ bozulmaması aqqında tenbi bar. Haber etilgenine köre, «aktsiya iştirakçilerine betlerini qapatmağa, silâ qullanmağa ve qanun talaplarını bozmağa talap etile», – dep qayd etti «Qırım birdemligi».
Karaliyev polis hadimleriniñ areketlerini «basqı usulı» dep adlandıra ve quvetçilerniñ ziyaretini onıñ cemaat faaliyetinen bağlı olğanını tüşüne.
«Bunı faal olğanım içün siyasiy taqip dep sayam. Quvetçilerniñ halqıma qarşı yapqanlarına razı degilim», – dep qayd etti faal.
«Qırım birdemligi», Seytosman Karaliyev memuriy mahkeme oturışuvlarında cemaat imayecisi olaraq muntazam sürette iştirak ete, dep qoştı. Qayd etilgenine köre, o, advokat Emil Kurbedinov, imam Ablâkim Galiyevniñ menfaatlarını temsil etti ve 2017 senesi qırımtatarlarnıñ bir kişilik narazılıqlarınen bağlı davalarda iştirak etti.
«Bundan ğayrı, faal Qırımnıñ Nazirler şurasına eki kere barğan siyasiy mabüslerniñ soy-sopları, qırımtatar areketiniñ veteranlarına refaqat etken edi. Olar qırımtatarlarğa qarşı açılğan cinaiy davalar boyunca berilgen apis cezalarına ve Qırım köpründe aman-aman 200 insannıñ tutulmasına qarşı narazılıq bildirdi», – dep aytıla haberde.
Rusiye uquq qoruyıcı organları Karaliyevge kelgenini resmiy şekilde izaatlamay.
Hatırlatamız, Rusiye quvetçileri 2020 senesi dekabr ayında Seytosman Karaliyevniñ evine subet keçirmek içün kelgen edi.
Daa evel berilgen malümatqa köre, Qırımda Rusiye polisiniñ hadimleri 2021 senesi aprelniñ 20-nde İçki qasabasında Qırımtatar Milliy Qurultayınıñ delegatı Rustem Mennanovğa «qanun bozulmaycağına dair» tenbi berdi.
