Kyivdeki Rusiye elçihanesiniñ binası ögünde sentâbrniñ 5-nde Qırımda sentâbrniñ 3-4-nde tutulıp esir alınğan qırımlılarğa qoltutuv aktsiyası keçirildi.
Bu aqta Qırım.Aqiqat mühbiri aktsiya yerinden haber ete.
«Qırım birdemligi» cemaat birleşmesiniñ malümatına köre, Rusiye quvetçileri Qırımda sentâbrniñ 3-4-nde beş insannı tuttı: Aziz Ahtemov, Asan Ahtemov, Nariman Celâl, Eldar Odamanov, Şevket Useinovnı.
Daa soñra beş qırımtatarınıñ tuvğanları, faaller ve vatandaş jurnalistleri olğan 40 insan Rusiye FSBsiniñ binası ögünde tutuldı. Bir qısmı yiberildi.
Qırımtatar Milliy Meclisiniñ reisi Refat Çubarov Kyivdeki aktsiyada çıqışta bulunıp, tutulğanlarnıñ soyadlarını ayttı.
«Bütün işğalci qurulışlar tutulğan insanlar anda yoq, dep külip ayta edi. Advokatlar olarnı bütün müessiselerde qıdırdı, ve tek keç gece insanlarnıñ bulunğan yeri belli oldı. Olar bütün kün FSB binasında ediler. Tünevin Qırımnıñ farqlı köşelerinden FSB binası olğan Franko bulvarına barğan yüzlernen qırımtatarına teşekkürlerimni bildirmege ister edim. Olar maña telefon etip rica ettiler: lütfen, barğanımıznı aytıñız, digerler bizden örnek alsın isteymiz. Tünevin halqımız köstergen birlik ve insan menligine quvandım», – dedi Çubarov.
Çubarovnıñ aytqanına köre, bugün advokatlar tutulğan eki kişini körip oldı: Nariman Celâlnı ve Eldar Odamanovnı. Aziz Ahtemov, Asan Ahtemov ve Şevket Useinovğa mustaqil advokatlar öyle de kirsetilmedi.
Aktsiyada tahminen 70 insan bar edi. Faallerniñ qollarında halqara toplulıqnı yarımadada insan tutuluvlarına cevap bermesine çağırğan yazuvlı şiarlar bar edi.
«Qırımda yañı cinaiy dava uydurılğanını köremiz. Büyük ihtimalnen, işğalciler özü yapqan diversiyanen bağlı cinaiy dava. Basqı devam eter, dep tüşünem, ve Qırımtatar Milliy Meclisiniñ vekilleri «diversant» olaraq basqığa oğraycağını körermiz. Tünevin aq qorçalayıcılar Nariman Celâl ve diger qırımtatarlarnıñ tutulıp esir alınğanınen bağlı ortaq beyanatnı imzaladı. Halqara vekillerniñ bu beyanatqa qoşulması bizim içün pek müim», – dep muracaat etti kelgenlerge Qırım aq qorçalayıcı gruppasınıñ yolbaşçısı Olga Skripnik.
Hatırlatamız, Aqmescit rayonınıñ Biy Tanış köyünde sentâbrniñ 4-nde saba Nariman Celâlnıñ evinde tintüv keçirildi, bundan soñ onı mavı Volkswagen mikroavtobusınen alıp kettiler. Qırımtatar Milliy Meclisiniñ reisi Refat Çubarov Nariman Celâl Qırım ve Aqyardaki Rusiye FSBsiniñ binasında buluna, dep yazdı Facebookta.
Rusiye akimiyeti ile dialog qurmaq imkânsız, dep aytqan edi: Qırımda tutulğan Nariman Celâl nenen belli (fotoresimler)
Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidentiniñ Qırım Muhtar Cumhuriyetindeki daimi temsilciligi qırımtatar faali Nariman Celâlnıñ tutuluvını tefsir etip, Rusiye uquq qoruyıcılarınıñ «Qırımtatar Milliy Meclisiniñ vekillerini taqip etüvnen» bağlı adımlarını takbih etti.
Ukraina Yuqarı Radasınıñ İnsan aqları vekâletlisi Lüdmila Denisova sentâbrniñ 4-nde qırımtatar faali Nariman Celâlnıñ tutuluvını Telegramda yazıp, «Rusiye FSBsiniñ hadimleri işğal etilgen Qırımda sahte davalar esasında Ukraina vatandaşlarınıñ evlerine sürip kirmege devam ete», dep ayttı.
Ukraina Tış işler naziriniñ birinci muavini Emine Ceppar Qırım.Aqiqatqa vaziyetni tefsir etip, Qırımda Rusiye quvetçileriniñ areketlerini «siyasiy basqı» dep adlandırdı.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Qırım Muhtar Cumhuriyeti ve Aqyar prokuraturası Qırımda sentâbrniñ 3-nde ve 4-nde keçirilgen tintüvler ve insanlarnıñ tutulmasınen bağlı cinaiy tahqiqat başlatılğanı aqqında bildire.
ABD Ukraina elçihanesi, yarımadada qırımtatar faali Nariman Celâl ve diger qırımlılarnıñ tutuluvını takbih ete, dep bildirdi.
Türkiye Tış işler nazirligi qırımtatar faali Nariman Celâl ve daa dört qırımtatarınıñ sentâbrniñ 3-4-nde tutuluvı sebebinden endişelengenini bildirdi.
Sentabrniñ 4-nde gece qırımtatar areketiniñ faali Nariman Celâl, Aqmescit rayonınıñ Biy Tanış (Pervomayskoye) köyünde saat 1:00 civarlarında Rusiye polisiniñ hadimleri Aziz Ahtemovnıñ evini tintti, soñra ise Ahtemovnı belli olmağan yerge alıp ketti, dep yazdı Facebook saifesinde.
Advokat Ayder Azamatovnıñ bildırgenine köre, Asan ve Aziz Ahtemovlarğa qarşı Rusiye Ceza kodeksiniñ 281-inci maddesiniñ 1-inci qısmına istinaden cinaiy davalar açıldı.
Nariman Celâl – qırımtatar siyasetçisi, oca, siyasetşınas ve jurnalist. 2013 senesinden başlap Qırımnıñ Rusiye tarafından işğal etilüvinden soñ Meclis faaliyeti yasaqlanğanına qadar Qırımtatar Milliy Meclis reisiniñ birinci muavini, informatsion-analitik bölüginiñ reberi.