Link açıqlığı

Saatnıñ esas haberi

"İman içün yüz yıl". Faaller - Yalta "Hizb ut-Tahrir davası" aqqında


Yalta "Hizb ut-Tahrir davası"nıñ iştirakçileri
Yalta "Hizb ut-Tahrir davası"nıñ iştirakçileri

Rusiye prokurorı, beraber qoşıp sayğanda, Yalta "Hizb ut-Tahrir davası"nıñ iştirakçileri içün 98,8 yıllıq apis cezasını istedi: Muslim Aliyevğa - 20 yıl, İnver Bekirovğa - 20,6 yıl, Emir-Üsein Kukuğa - 15 yıl, Vadim Sirukqa - 15 yıl, Arsen Cepparovğa - 13,6 yıl, Refat Alimovğa - 14,6 yıl.

Bu dava boyunca qabaatlanğanlar 2016 yılınıñ fevral-aprel aylarında tutulğan edi. Olarnı, Rusiyede yasaqlanğan islâmiy siyasiy "Hizb ut-Tahrir" teşkilâtına aitliginde qabaatlaylar.

Ukrainanıñ Tış İşler Nazirligi, Yalta "Hizb ut-Tahrir davası"nıñ iştirakçilerini azat etmege Rusiyeden talap ete.

Milliy Meclisniñ azası Gayana Yüksel, rusiye akimiyetiniñ böyle areketlerini qırımtatar halqına qarşı yapılğan basqı, dep saya.

Bu, Qırım tamır halqına qarşı yapılğan basqınıñ bir parlaq misalidir
Gayana Yüksel

"Yapılmağan cinayetler içün böyle qorqunçlı cezalar - Qırımda 2014 senesinden soñ peyda olğan kerçeklerni köstergen daa bir misaldir. 23 yıl devamında, em de ondan soñ da, "terrorcı" dep adlandırılğan adamlar bir terror eylemini yapmadı, bir pretsendent olmadı. Bu, Qırım tamır halqına qarşı yapılğan basqınıñ bir parlaq misalidir", - dedi o Qırım.Aqiqatqa.

Gayana Yüksel
Gayana Yüksel

Onıñ fikrince, Rusiye, Ğarp dünyası içün mahsus qırımatatarlarnı Qırımda telüke sıfatında köstermege tırışa.

Rusiyeniñ özüne ise, Qırımda sanki bir telüke bar da, o onen küreşkenini köstermege kerek
Gayana Yüksel

"Terrorcılıq telükesinden qorqqan ğarbiy memleketler vekilleri, bu malümatnı ve qabaatlavlarnı eşitkende, çoqusı alda tafsilâtnı bilmege, vaziyetni talil etmege tırışmayıp, sadece bu laflarğa inana. Rusiyeniñ özüne ise, Qırımda sanki bir telüke bar da, o onen küreşkenini köstermege kerek, bu stsenariyde baş rolni ise qırımtatarlarğa ayırdılar", - dey Gayana Yüksek.

Qırımda işkencege oğrağan ve bundan soñ qıta Ukrainağa çıqıp ketken qırımtatar faal Renat Paralamov emin ki, terrorcılıq manaçığını qullanıp, Rusiye akimiyeti böylece yarımadada hoşuna ketmegenlernen küreşe.

"Terrorcılıqnen küreş" - hoşlarına kelmegen halqnen küreşke çevirildi
Renat Paralamov

"Hizb ut-Tahrir" davalarınıñ esas rezonansı, bu teşkilâtnıñ alâqası olmağan qabaatlavlarnen bağlıdır. Ukrainada qanuniy olaraq yigirmi yıllıq faaliyetniñ tarihi buña misaldir. Qırımda terrorcılıq telükesi aqqında bir vaqıt eşitmey ediler, amma 2014 senesiniñ vaqialarından soñ, körünip tura ki, "terrorcılıqnen küreş" - hoşlarına kelmegen halqnen küreşke çevirildi. Qırım meselesine halqara diqqat olğanı içün, bu daa açıq-aydın körüne. Bütün repressiyalar umumdünya islamofobiyasınen bağlı. Rusiyede bundan çette qalmay, aksine, Qırımğa kelgeninden soñ, öz qıtasında becergen siyasetni Qırımda da kerçekleştirip başladı", - aytıp berdi Qırım.Aqiqatqa faal.

Renat Paralamov
Renat Paralamov

O, terrorcılıqta qabaatlav - "Qırımda silâsız tirenme içün cezalav", dep ayta.

"Men bellesem, Rusiye bütün siyasiy mabüslerni azat etmege azır, böylece o, onen añlaşmaq ve keçmişte olğan munasebetlerni qaytarmaq mümkün, dep dünya topluluğına kösterecek ola. Amma mında öz kârını qıdırğan daa büyük oyuncılar olğanı içün, biraz qıyınlıqlar çıqmaq mümkün. Qırım musulmanları küreşte küçni qullanmadı, bunıñ tasdıqı - qırımtatar milliy areketiniñ tarihındadır. Onıñ içün bugün biz, silâsız küreş Rusiye Federatsiyasınıñ yalanlarını ve terrorcılıqta sahte qabaatlavlarnı aydınlatqanını köremiz. Qırım meselesi dünya topluluğınıñ diqqatını celp etkeni içün, terrorcılıq qabaatlavları qanunsız ve yalan olğanı daa yahşı körüne", - saya faal.

Qırımnı terk etmege mecbur olğan qırımtatar faali İsmail Ramazanov, "Hizb ut-Tahrir" davaları terrorcılıqnen degil de, Qırımnıñ ilhaqına silâsız tirenüvnen bağlı, dep tüşüne.

Rusiye Federatsiyası qırımtatar meselesinen manipulâtsiya etmege tırışa
İsmail Ramazanov

"Menimce, Rusiye Federatsiyası qırımtatar meselesinen manipulâtsiya etmege tırışa. "Hizb ut-Tahrir davası" iştirakçilerine barğanda, olarnıñ arasında belli uquq qoruyıcılar bar, misal içün Emir-Üsein Kuku, Server Mustafayev. Olarnıñ arasında faaller bar, volontörlar. Olarnıñ episi halqımıznıñ Rusiye işğaline silâsız tirenüvine öz issesini qoştı", - böyle dep, öz fikrini Qırım.Aqiqatqa bildirde faal.

İsmail Ramazanov
İsmail Ramazanov

"Azat Qırım" cemiyet teşkilâtınıñ faali Emine İbraimova, zulum ve basqılar qırımtatar halqınıñ ruhunı qırmaycağına inana.

Qırımtatarlar, bizni qorquzıp olamacaqlarını tasdıqladı
Emine İbraimova

"Biz "qıyış küzgüler qırallığına" tüştik, mında hırsızlanğan millionlar içün medal ve unvanlarnı bereler, iman içün ise - yüz yıllıq apis cezasını. Bütün bular, bu devlette azatlıq ve insan aqları ne olğanını yahşı añlamağanlarını köstere. Ümüt etem, vaziyet deñişir, çünki kün-künden halq serbestlikke daa çoq ıntıla. Qırımtatarlar, bizni qorquzıp olamacaqlarını tasdıqladı. Biz azatlıqnı pek sevgen halqmız, basqılar bunı deñiştiremez", - dedi faal.

Emine İbraimova
Emine İbraimova

Ukraina Yuqarı Radasınıñ insan aqları vekâletlisi Lüdmila Denisova haber etti ki, Ukraina prezidentiniñ yardımcısı Andrey Yermak reberlik etken iş gruppası, 113 ukrain mabüsni (olardan 89 - qırımtatarlar) azat etmek içün aytışmalarnıdevam ete.

Ukraina, ilhaq etilgen Qırımda siyasiy sebepler neticesinden taqibatqa oğrağan qırımtatarlarğa haber destegini yapmalı. Bunı oktâbr 14-ünde, Qırım evinde ekinci Bağçasaray "Hizb ut-Tahrir davası" iştirakçileriniñ tuvğanları toplanğanda ayttı advokat Lilâ Gemeci.

XS
SM
MD
LG