Ukraina, ilhaq etilgen Qırımda siyasiy sebepler neticesinden taqibatqa oğrağan qırımtatarlarğa haber destegini yapmalı. Bunı oktâbr 14-ünde, Qırım evinde ekinci Bağçasaray "Hizb ut-Tahrir davası" iştirakçileriniñ tuvğanları toplanğanda ayttı advokat Lilâ Gemeci.
"Ukrainanıñ tarafından haber destegi - bugünge eñ müimidir. Qırımda olğan taqibatlar aqqında er yerde aytmaq kerek. Sade adamlarğa aytmaq kerek ve "terrorcı" yarlığı - qırımlılarnıñ, Ukraina ve halqara toplulıqnıñ cinaiy davalardan diqqatnı ayırmaq içün taqılğanını añlatmaq kerek. Çünki terrorcı sözü qorqunçlı ve bu davalarnıñ sebebine dalmasañ, elbette ki, adamlar çevirilecek. Er ikâyeni tanılğan, belli yapmaq kerek. Bugün bu - eñ müim meseledir", - dep añlattı o.
Ekinci Bağçasaray "Hizb ut-Tahrir davası"nıñ iştirakçileri Server Zekiryayev ve Memet Belâlovnı Rostov-na-Donu (Rusiye) şeeriniñ №1 SİZOsına etap ettiler.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Avgustta Şimaliy Kavkaz bölge arbiy mahkemesi, ekinci Bağçasaray "Hizb ut-Tahrir davası" iştirakçileriniñ tevqifini altı ayğa uzattı.Timur İbragimov, Marlen Asanov, Memet Belâlov, Seyran Saliyev, Server Zekiryayev, Ernes Ametov, Server Mustafayev ve Edem Smailov, SİZOda 2020 yılı fevral 13-ünece tutulacaq.
