Şimaliy Kavkaz bölge arbiy mahkemesi avgust 26-sında, ekinci Bağçasaray "Hizb ut-Tahrir davası" iştirakçileriniñ tevqifini altı ayğa uzattı.
Timur İbragimov, Marlen Asanov, Memet Belâlov, Seyran Saliyev, Server Zekiryayev, Ernes Ametov, Server Mustafayev ve Edem Smailov, SİZOda 2020 yılı fevral 13-ünece tutulacaq. Bunı Qırım.Aqiqat mühbirine advokat Aleksey Ladin aytıp berdi.
Bu dava boyunca birinci ilk oturışma Rostov-na-Donuda, qabaatlanğanlar tutulğan №1 Aqmescit SİZOsınen video bağ vastası ile keçrilidi. Amma olarnıñ advokatları, Aqmescitteki Qırım garnizon arbiy mahkemesinden iştirak ete ediler.
"Mahkeme, imayeniñ bütün muracaatlarını lâğu etti. Amma mahkemeci, öz isteginen bütün dava iştirakçileriniñ SİZOda tevqifini yarım yılğan uzattı (2020 yılı fevral 13-ünece)", - aytıp berdi o.
Bu cinaiy davanı baqacaq nevbetteki oturışma, sentâbrniñ 3-ıne tayinlendi. Oñace, advokat aytqanına köre, qabaatlanğanlarnıñ episini Rostov-na-Donu şeeriniñ SİZOsına etep etecekler.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
