Ekinci Bağçasaray "Hizb ut-Tahrir davası"nıñ iştirakçileri Server Zekiryayev ve Memet Belâlovnı Rostov-na-Donu (Rusiye) şeeriniñ №1 SİZOsına etap ettiler.
Bunı Qırım.Aqiqatqa advokat Edem Semedlâyev aytıp berdi.
"Bugün, Belâlov ve Zekiryayev eki kün evel Rostov SİZOsına etap etilgeni belli oldı. Şimdi olar karantinde, bu - etap etilgen apisliler içün er zamanki al", - dedi advokat.
Semedlâyev, Krasnodar SİZOsında bu davanıñ daa eki iştirakçisi olğanını qoştı, amma "olarnı yaqın vaqıtta da Rostovğa alıp keterler", dep tüşüne.
Advokat, 2019 senesi oktâbr 29-ında ekinci Bağçasaray "Hizb ut-Tahrir davası" boyunca birinci mahkeme oturışı olacaq, dep aytıp berdi.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Avgustta Şimaliy Kavkaz bölge arbiy mahkemesi, ekinci Bağçasaray "Hizb ut-Tahrir davası" iştirakçileriniñ tevqifini altı ayğa uzattı.Timur İbragimov, Marlen Asanov, Memet Belâlov, Seyran Saliyev, Server Zekiryayev, Ernes Ametov, Server Mustafayev ve Edem Smailov, SİZOda 2020 yılı fevral 13-ünece tutulacaq.
