Aqmescitteki «Hizb ut-Tahrir davası» boyunca mahküm etilgen Emil Cemadenov Salavattaki Rusiye koloniyasında ekinci kere ceza izolâtorına qapatıla. Bu aqta o, ömür arqadaşı Liana Belâlovağa ayttı.
«Qırım birdemliginiñ» malümatına köre, martnıñ 21-nde Cemadenov qorantasına resmiy telefon etüv aqqından faydalandı.
«Emil ilk sefer koloniyadan resmiy şekilde telefon etti. O, Salavat şeeriniñ №16 tüzetüv koloniyasında buluna. Şimdi ceza izolâtorında buluna, ekinci kere. Birinci kere sağlıq vaziyeti sebebinden meşğuliyetlerni yapmağanı içün ceza izolâtorına 20 künge qapatıldı. Birinci ceza izolâtorından çıqqanınen ekincisine qapatqanlar», – dep tarif etti Belâlova.
Onıñ aytqanına köre, aqayı ana-babası ve balalarınıñ sağlığı aqqında soradı.
«Halqnıñ haberlerini soradı. Er keske selâm ayttı. Oña bir şey bermeyler, tek mektüp ketireler. Memlekette pandemiyanen bağlı vaziyetni bile, çünki koloniyada da karantin ilân etildi ve bütün körüşüvler yasaqlandı», – dedi Liana.
Rusiye Yuqarı mahkemesi 2019 senesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
