Aprelniñ 29-nda işke başlağan Estoniyanıñ yañı Tış işler naziri Urmas Reynsalu işğal etilgen Donbas ve Qırım sakinlerine Rusiye pasportlarınıñ qolaylaştırılğan tertipte berilmesi sebebinden Rusiyege qarşı qoşma sanktsiyalarnı kirsetmege teklifinden başlamağa niyetlene.
Mayısnıñ 14-nde Avropa Birligi Tış işler nazirleriniñ körüşüvinde o, Rusiyege qarşı yañı sanktsiyalarnı kirsetüv meselesini kötermege istey, dep bildirdi «İnterfaks» Rusiye neşiri «Eesti Paevaleht» Estoniya gazetasınıñ malümatına esaslanıp.
«Rusiye – soñki on yılda qomşu memleketlerge qarşı küç qullanğan nükleer devletidir. Estoniyanıñ menfaatlarına köre, memleketlerniñ mustaqilligi ve topraq bütünligine qoltutmalı, çünki istilânıñ bunıñ kibi adımları uyğun bir şekilde izaatlanmalı», – dep bildirdi Reynsalu.
O, «Rusiyeniñ Minsk añlaşmalarını bozıp, Qırım ve Donbasta qolaylaştırılğan tertipte pasportlarnı bermege başlağan soñ atqan soñki adımlarınen bağlı ola bilecek qoşma tedbirlerni Tış işler nazirliginden talil etmesini rica etti».
Aprelniñ 24-nde Rusiye prezidenti Vladimir Putin Rusiye qoltutqan aydutlar tarafından kontrol etilgen Ukraina şarqındaki rayonlarnıñ ve işğal etilgen Qırım sakinlerine Rusiye vatandaşlığını qolay almağa imkân bergen buyruqnı imzaladı. Ukraina ve ittifaqdaşları bu qararnı sert bir şekilde tenqit etkenler.
Aprelniñ 27-nde Putin Pekinde olıp, Kreml bütün ukrainalılarğa qolaylaştırılğan esnas boyunca Rusiye pasportlarınıñ berilüv imkânını baqa, dep bildirdi. Mayısnıñ 1-nde o, Qırımda doğğan ve yaşağan ukrainalılarğa üç ay içinde Rusiye pasportlarını bermege imkân bergen buyruqnı imzaladı.
Ukraina Tış işler nazirligi Rusiye akimiyetiniñ Rusiye tarafdarları küçleri tarafından işğal etilgen Donbas sakinlerine Rusiye pasportlarınıñ berilüvini qolaylaştırmaq qararını tenqit etti. Ukraina Rusiye akimiyetiniñ işğal altındaki Donbas topraqlarında yaşağanlarğa Rusiye pasportlarını qolay bermek qararı sebebinden Birleşken Milletler Havfsızlıq şurasına muracaat etti.
Yañı saylanğan Ukraina prezidenti Volodımır Zelenskıynıñ taqımı Facebook beyanatında Rusiye memleketimiz tarafından vaqtınca kontrol etilmegen topraqlarımızda bulunğan Ukraina vatandaşlarına Rusiye pasportlarını berüv fermanı ile işğalci devlet olaraq mesüliyetini tanıdı, dep qayd etti.
