Memleketimiz tarafından vaqtınca kontrol etilmegen topraqlarımızda bulunğan Ukraina vatandaşlarına Rusiye pasportlarını berüv fermanı ile Rusiye işğalci devlet olaraq mesüliyetini tanıdı. Bu aqta Facebookta yañı saylanğan Ukraina prezidenti Volodımır Zelenskıynıñ taqım beyanatında aytıla.
«Bu areketler dünya toplulığına Ukrainağa qarşı cenk alıp barğan istilâcı devlet Rusiyeniñ kerçek rolüni daa bir kere köstere», – dep aytıla beyanatta.
Zelenskıynıñ taqımı bu ferman esas vazifeniñ yerine ketirilmesine – ateş toqtatılmasına – yaqınlaştırmay, dep qayd etti.
«Ukraina işğal etilgen topraqlarda bulunmağa mecbur olğan vatandaşlarını qorçalamaq, kerekli yardım köstermek ve aqlarını temin etmek içün elinden kelgenini yapacaq. Ukraina vaqtınca işğal etilgen topraqlarda Ukraina vatandaşlarınıñ menfaatları, aqları ve serbestligini qorçalav meselesinde halqara toplulıqnıñ yardımına işana ve Rusiyege diplomatik ve sanktsion basqı quvetleştirilecek, dep ümüt ete», – dep aytıla Zelenskıynıñ taqımınıñ beyanatında.
Ukraina prezidenti Petro Poroşenko Rusiye prezidenti Vladimir Putinniñ Donbasnıñ işğal etilgen topraqlarınıñ sakinleri içün pasportlar buyruğı sebebinden Ukraina halqına muracaat etti.
Ukraina Tış işler nazirligi Rusiye akimiyetiniñ Rusiye tarafdarları küçleri tarafından işğal etilgen Donbas sakinlerine Rusiye pasportlarınıñ berilüvini qolaylaştırmaq qararını tenqit etti. Ukraina Rusiye akimiyetiniñ işğal altındaki Donbas topraqlarında yaşağanlarğa Rusiye pasportlarını qolay bermek qararı sebebinden Birleşken Milletler Havfsızlıq şurasına muracaat etti.
Aprelniñ 24-nde Rusiye prezidenti Vladimir Putin Donbasnıñ işğal etilgen topraqlarında yaşağanlarğa Rusiye vatandaşlığını qolaylaştırılğan tertipte almağa imkân berecek buyruqnı imzaladı. Vesiqa metni Kremlniñ resmiy saytında Ukraina prezidenti saylavlarından üç kün keçken soñ derc etildi.
Qolaylaştırılğan vatandaşlıq aqqı «insan aqları ve serbestligini qorçalamaq içün gumanitar maqsadlarnen» berilecek, dep aytıla fermanda. İstegi olğan er kes ariza ve «DNR» ve «LNR» gruppalarınıñ regionda yaşağanını tasdıqlağan vesiqalarnı Rusiye İç işler nazirliginiñ bölüklerine bere bile. Arizalar üç ay içinde baqılacaq.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
