Ukraina Tış işler nazirligi Rusiye akimiyetiniñ Rusiye tarafdarları küçleri tarafından işğal etilgen Donbas topraqlarınıñ sakinlerine Rusiye pasportlarını berüv esnasını qolaylaştırmaq qararını tenqit etti, dep haber ete Azatlıq Radiosı.
«Rusiyeniñ işğal altındaki Ukraina topraqlarında Rusiye pasportlarını bermek qararı – istilâ ve iç işlerimizge kirişüvniñ devamıdır. Donbas işğaliniñ yañı «pasport» basamağıdır. Rusiye işğal etken topraqlarda yaşağan Ukraina vatandaşlarını Rusiye pasportlarını almamalarına çağıram. Rusiye sizni bugünden marum qaldırdı, şimdi ise kelecegiñizni alacaq ola», – dep yazdı Ukraina Tış işler naziri Pavlo Klimkin Twitterde.
Aprelniñ 24-nde Rusiye prezidenti Vladimir Putin Donbasnıñ işğal etilgen topraqlarında yaşağanlarğa Rusiye vatandaşlığını qolaylaştırılğan tertipte almağa imkân berecek buyruqnı imzaladı. Vesiqa metni Kremlniñ resmiy saytında Ukraina prezidenti saylavlarından üç kün keçken soñ derc etildi.
Qolaylaştırılğan vatandaşlıq aqqı «insan aqları ve serbestligini qorçalamaq içün gumanitar maqsadlarnen» berilecek, dep aytıla fermanda. İstegi olğan er kes ariza ve «DNR» ve «LNR» gruppalarınıñ regionda yaşağanını tasdıqlağan vesiqalarnı Rusiye İç işler nazirliginiñ bölüklerine bere bile. Arizalar üç ay içinde baqılacaq.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2018 senesi dekabr ayına qadar zıddiyet vaqtında 13 biñ insan elâk oldı, tahminen 30 biñ yaralandı.
