Rusiye prezidenti Vladimir Putin Ukraina kontrolinde olmağan «DNR» ve «LNR» gruppalarınıñ topraqlarında yaşağan insanlarğa Rusiye vatandaşlığını qolay almağa imkân bergen buyruqnı imzaladı. Vesiqa metni Kremlniñ resmiy saytında derc etildi.
«Ukrainanıñ Donetsk ve Lugansk vilâyetleriniñ ayrı rayonlarında daimiy sürette yaşağan insanlarnıñ 2002 senesi mayısnıñ 31-ne ait Federal qanunnıñ 14-ünci maddesiniñ sekizinci qısmınıñ «Rusiye Federatsiyasınıñ vatandaşlığı aqqında» №62 Federal qanunına köre Rusiye Federatsiyasınıñ vatandaşlığına qabul etilüv arizasını bermek aqları bar», – dep aytıla vesiqada.
Bundan evel Rusiye kütleviy haber vastaları Rusiye akimiyetiniñ böyle niyetleri aqqında yazğan edi. Berilgen malümatqa köre, işğal altındaki topraqlarda yaşağan ukrainalılar vatandaşlıq imtianını bermeycek ve pasport almaq içün Rusiyede yaşamağa mecbur olmaycaq.
Ukraina akimiyeti ve Ğarp Moskvanıñ qararını daa izaatlamadı.
