Mahsus Qırım.Aqiqat içün
Rostov vilâyetinde Donetsk ve Lugansk vilâyetleriniñ işğal etilgen rayonlarınıñ sakinlerine Rusiye pasportlarını bergen ilk merkezniñ açılışı Kremlniñ yañı Ukraina prezidenti Volodımır Zelenskıyge qarşı olmasında areket etecegini isbatlay. Putin şaqalaşmaycaq. Ve akimiyet deñişken soñ Ukrainadaki vaziyetni tüşüngen er bir insan bunı añlamaq kerek.
2014 senesi, Maydandan soñ, Putin Ukrainağa qarşı faal areketlerge azır degil, siyasiy beyanatlarnen sıñırlanacaq, eñ beteri – gaz fiyatını arttıra bile, dep tüşünmek mümkün edi. Qırım ilhaqınen bağlı soñki qarar alınğan Rusiye parlamentiniñ toplaşuvı ögüne em Ukrainada, em Ğarpta bir çoq siyasetçiniñ Rusiye prezidenti başqasınıñ toprağını zapt etmeyceginden, tek Kyiv tarafından uzlaşuv olsun dep, Qırımnı kontrol eteceginden emin olğanını hatırlayım. Başqa memleketniñ toprağını alıp özüne qoşmaz ya? İlhaq – küçlü, açıq bir ilhaq qararını almaz ya?
Putin ve umumen Kreml er angi areketke azır, daa yaqında bu areketler medeniy dünyada imkânsız kibi körüne edi
Şimdi ise bilemiz – yapa bile. Putin ve umumen Kreml er angi areketke azır, daa yaqında bu areketler medeniy dünyada imkânsız kibi körüne edi – Qırımdan başlap Amerika saylavlarına kirişüvge qadar, Donbastan başlap Solsberige qadar. Şunıñ içün onı adiy propaganda, internetteki optimistik levhalar ve eminliknen yapılğan beyanatlar vastasınen yeñmek mümkün degil. Beyanatlarğa tanklarnen cevap berilse, olarnıñ iç bir emiyeti yoq.
Kremlde Ukraina akimiyetine Volodımır Zelenskıynı ketirmek kibi vazife olmağanını endi yazğan edim. Yoq, vazife, ğaliba, başqa edi – Petro Poroşenkonıñ yeñilüvine yardım etmek. Çünki Ukrainanıñ şimdiki prezidenti Moskva ile Kreml stsenariyi boyunca añlaşmadı ve Rusiye mahsus hızmetleri prezident Zelenskıy ile Ukrainadaki vaziyetni kerginleştirmek ve… bütünleştirmek daa qolay olur, dep tüşüne.
Rusiye mahsus hızmetleri prezident Zelenskıy ile Ukrainadaki vaziyetni kerginleştirmek ve… bütünleştirmek daa qolay olur, dep tüşüne
Şimdi buña qıymet kesmeycem. Amma vazifeni yerine ketirmek içün işke başlağanları belli. Em de Zelenskıy ile memleketniñ şarqiy ve cenübiy-şarqiy vilâyetlerindeki saylayıcılar içün küreşmege başlaylar – yani yañı prezidentke qoltutqanlarnıñ sayısı çoq olğan vilâyetlerde. Bu tabiiy bir şey: Poroşenko ile oña başından berli qoltutmağan ve 2014 senesi favoritler arasında öz namzetini körmeyip, ekseriyeti saylavlarğa barmağan bu saylayıcılar içün küreşniñ bir manası yoq edi.
Rusiye prezidenti eki memleketniñ umumiy vatandaşlığı, bir halq aqqında aytsa – o, şaqa etmey. O, «sessiz ilhaq» programmasını añlata
Kreml Zelenskıy Ukrainanıñ şarqını aldattı dep köstermege mecbur. Putin ile añlaşmağa istemey ve añlaşıp olamay, cenk devam etecek – elbette, «konstruktiv olmağan» Kyivniñ qabaatı bar, tarifeler tüşmeycek, aylıqlar ise köterilmeycek. Kreml ise, aksine, şarqtaki «bir halq» içün elinden kelgen er şeyni yapacaq – işğal altındaki topraqlarnıñ sakinlerine pasportlarnı bermekten başlap, daa soñra bütün Ukraina vatandaşlarına pasportlarnı kütleviy şekilde berecek. Tabiiy ki, Rusiyege yaqın regionlarnıñ sakinleri içün Avropa memleketlerine yaqın yaşağanlardan bu daa müim ola.
Putinniñ maqsadı adiy, eñ yaqın vaqıtta onı kerçekleştirmek içün çalışacaqtır. Volodımır Zelenskıynıñ saylayıcısı onıñ saylayıcısı, Vladimir Putinniñ saylayıcısı olmalı. Rusiye prezidenti eki memleketniñ umumiy vatandaşlığı, bir halq aqqında aytsa – o, şaqa etmey, kelecekteki zenaatdaşını mısqıllamay. O, Ukraina şarqınıñ «sessiz ilhaq» programmasını añlata, dep doğru ayta Latviya Tış işler naziri Edgar Rinkeviç.
Volodımır Zelenskıy bu «sessiz ilhaqqa» qarşı laflardan ğayrı ne yapa bile, qomşu devletniñ regionına çevirilmesi istenilgen memleketniñ prezidenti olaraq saylanğanını añlaymı?
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, Kyivli jurnalist, Qırım.Aqiqat közeticisi