Qırım Muhtar Cumhuriyeti ve Aqyar prokuraturası Qırımnıñ Qarasuvbazar rayonında çalışqan sabıq ukrain qadısına qarşı devlet hainliginde qabaatlağan cinaiy tahqiqatnı mahkemege yolladı, dep bildire müessiseniñ matbuat hızmeti.
Bu madde on eki yıldan on beş yılğa qadar apis cezası berilmesini belgilemekte.
Prokuraturanıñ malümatında qayd etilgenine köre, Qırımnıñ Rusiye işğalinden soñ qabaatlanğan kişi Ukraina halqına bergen ant sözlerinden vazgeçip, Rusiye mahkeme organlarına hızmet etip başladı.
«Qabaatlanğan (qadı – QA) üç qırımtatar faalini qanunsız şekilde memuriy mesüliyetke çekip, 5 biñden 10 biñ rublege qadar para cezasını berdi. Bundan ğayrı, «qadı» Rusiye qanunlarına esaslanıp, bir faalni cinaiy mesüliyetke çekti ve 1 yılğa azatlıqtan marum etti», – dep aytıla müessise haberinde.
Prokuratura, qırımlılar «qırımtatar faalleri Aqmescit-Aqyar, Herson-Canköy-Kefe-Keriç, Aqmescit-Kefe-Keriç yollarını bir qaç yerde qapatıp, Qırım işğaline ve qırımtatar halqınıñ lideri Mustafa Cemilevniñ yarımadağa kiriş yasağına qarşı çıqqan 2014 senesi mayıs 3 vaqialarında iştirak etti», dep bildire.
Prokuratura qabaatlanğannıñ adını ve soyadını aydınlatmay. Media ile laf etmege vekâletli olmağan ve adını gizli qaldırmağa istegen memurnıñ Qırım.Aqiqatqa bildirgenine köre, laf Vahtang Avtandiloviç Çubabriya aqqında kete. Qırım.Aqiqat qabaatlanğan kişige tefsir almaq içün muracaat etti, amma cevabını alamadı.
2010 senesi Qırım Muhtar Cumhuriyetiniñ Qarasuvbazar rayon mahkemesiniñ reisi olıp, «Qırım Muhtar Cumhuriyetinde nam qazanğan uquqçı» unvanını alğan edi.
Qırım işğalinden soñ Çubabriya Rusiye kontrolindeki Qarasuvbazar rayon mahkemesinde çalıştı, lâkin şimdi mahkeme erkânına kirmey. Qırımnıñ Rusiye ükümeti saytında Vahtang Çubabriya Qırımnıñ Rusiye ükümetinde Devlet qaydı ve kadastr devlet komitetiniñ uquqiy teminlev idaresiniñ yolbaşçısı ola.
Qırım Muhtar Cumhuriyeti ve Aqyar Prokuraturası 2014 senesi mayısnıñ 3-nde olğan adise-vaqialar sebebinden qırımtatar faallerine para cezasını bergen Rusiye kontrolindeki Bağçasaray ve İçki rayon mahkemeleriniñ eki qadısına qarşı cinaiy davalarnı mahkemege yolladı.
Daa evel berilgen malümatqa köre, Qırım Muhtar Cumhuriyeti ve Aqyar prokuraturası Ukraina Ceza kodeksiniñ 111-inci maddesiniñ 1-inci qısmına istinaden devlet hainliginde qabaatlanğan Rusiye kontrolindeki İçki rayon mahkemesi ve Qarasuvbahar rayon mahkemesiniñ qadılarına qarşı cinaiy davalarnı mahkemege yolladı.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
