Qırım Muhtar Cumhuriyeti ve Aqyar Prokuraturası 2014 senesi mayısnıñ 3-nde olğan adise-vaqialar sebebinden qırımtatar faallerine para cezasını bergen Rusiye kontrolindeki Bağçasaray ve İçki rayon mahkemeleriniñ eki qadısına qarşı cinaiy davalarnı mahkemege yolladı.
Müessise bildirgenine köre, qadılar Ukraina Ceza kodeksiniñ 111-inci maddesiniñ 1-inci qısmına istinaden (devlet hainligi) qabaatlana. İşbu maddege köre 15 yılğa qadar apis cezası berile bile.
«2014 senesi qabaatlanğanlar qanunsız qurulğan Qırım Cumhuriyeti Bağçasaray ve İçki rayon mahkemelerinde vazife alıp, Ukraina halqına bergen ant sözüne hainlik yaptı. Qanuniy bir sebebi olmağanda Rusiye Federatsiyasınıñ qanunlarına riayet etip, qabaatlanğanlar dört qırımtatarını memuriy uquq bozuluvında, hususan vatandaşlarnıñ aynı vaqıtta toplaşqanını teşkil etkeninde qabaatlap, er birine 10 biñden 40 000 rublege qadar para cezasını berdi», – dep aytıla haberde.
Laf 2014 senesi mayısnıñ 3-nde olğan adise-vaqialar aqqında kete. Qırımlılar Qırım işğaline ve qırımtatar halqınıñ lideri Mustafa Cemilevniñ Qırımğa kiriş yasağına qarşı çıqıp, Aqmescit-Aqyar, Herson-Canköy-Kefe-Keriç, Aqmescit-Kefe-Keriç ve diger yollarnı qapatqan edi. Şübhelilerniñ adları ve soyadları prokuraturanıñ haberinde aydınlatılmay.
Mediağa malümat bermeknen vekâletli olmağan memurnıñ Qırım.Aqiqatqa bildirgenine köre, laf Marina Nikişçenko (Bağçasaray rayon mahkemesi) ve İgor Brajnik (İçki rayon mahkemesi) aqqında kete. Olar Qırım Muhtar Cumhuriyeti ve Aqyar Prokuraturasınıñ qabaatlavlarını açıq şekilde izaatlamadı.
Daa evel berilgen malümatqa köre, Qırım Muhtar Cumhuriyeti ve Aqyar prokuraturası Ukraina Ceza kodeksiniñ 111-inci maddesiniñ 1-inci qısmına istinaden devlet hainliginde qabaatlanğan Rusiye kontrolindeki İçki rayon mahkemesi ve Qarasuvbahar rayon mahkemesiniñ qadılarına qarşı cinaiy davalarnı mahkemege yolladı.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
