Bugün Qırımtatr Milliy Qurultayınıñ delegatı Edem Dudakovnıñ davası baqılğan Bağçasaray rayon mahkemesiniñ binası yanında 15 kişi yaqalandı. Bunı "Qırım birdemligi" cemaat birleşmesi haber etti.
"Avtozaktaki adamlarnıñ aytıp bergenini kibi, tışarıda polis hadimleri olarğa qarar oquğan, adamlar diñlep, yeterli içtimaiy mesafege turğanlar, amma operativciler olarnı avtobusqa ozğarğanlar", - dep yazıla bildirmede.
Yaqalanğanlarnı protokol tizmek içün İç işler nazirliginiñ Bağçasaray rayon bolügine alıp ketkenler. Uquqiy yardım köstermek içün olarnıñ peşinden advokat Edem Semedlâyev ve Emil Kürbedinov ketkenler.
"Yaqalanğanlar arasında vatandaş jurnalisti ve "Qırım birdemliginiñ" mühbiri Aziz Azizov ve siyasiy mabüs Seyran Saliyevniñ anası Zodiye Saliyeva bar", - dep haber ettiler faaller.
Qayd etilgeni kibi, Saliyeva yaramağan, oña acele yardım çağırtqanlar.
"Qırım birdemligi" yaqalanğanlarnıñ cedvelini yayınladı:
- Mustafayev Seydamet
- Muzaffarov Ceppar
- Seytaliyev Nariman
- İzmaylov Eleonor
- Seydametov Reşat
- Ümerov Arsen
- Ümerov Amethan
- Lümanov Memet
- Yagyayev Reşat
- Nuradinov Riza
- Abdulganiyev Gani
- Osmanov Arif
- Saliyeva Zodiye
- Üseinov Kâzim
- Azizov Aziz
Rusiyeniñ nezaretinde olğan Bağçasaray rayon mahkemesi Qırımtatr Milliy Qurultayınıñ delegatı Edem Dudakovnı 10 künge tevqif etti.
Advokat Edem Semedlâyevniñ bildirgenine köre, Edem Dudakov milletlerara zıddiyet çıqarğanında qabaatlana.
Tintüv aqqında Qırımtatar Milliy Meclisiniñ reisi Refat Çubarov bildirdi. Onıñ aytqanına köre, «Dudakov – Bağçasasaraydaki Han sarayınıñ rus işğalcileri tarafından yoq etilüvi aqqında qorqmayıp aytqanlardan biridir».
Faallerniñ bildirgenine köre, tintüv Ekstremizm ile küreş merkeziniñ hadimleri tarafından keçirile, Dudakovnı ise kelgen advokatlarınen körüştirmeyler.
Advokat Edem Semedlâyevniñ aytqanına köre, tintüvden soñ Dudakov Bağçasaray polis bölügine ketirildi, lâkin onı müvekkiline kirsetmediler.
Advokat Emine Avamilevanıñ aytqanına köre, «tintüv sebebi 2017 senesi içtimaiy ağlarnıñ qullanıcısınıñ yazğanları altında Edem Dudakovnıñ ekstremist izaatı olğan eken».
