Qırım gazetaları gaznıñ paalılaşması aqqında yaza, Qırımğa yürüşni teşkil etken ukrain siyasetçilerni tefsir ete ve Aqmescitteki yapılğan deñişmeler aqqında tarif ete.
"Krımskaya pravda" ("Qırım aqiqatı") gazetası "Fevralde gaz paalılaşacaq" maqalesinde bu yıl gaz fitayı eki kere artacağı aqqında haber ete. "Eali içün tabiiy gaz fiyatınıñ artması Rusiye Federal Antiinhisar hızmeti tarafından "Çernomorneftegaz" şirketi qazıp çıqarğan gaznıñ top fiyatınıñ artmasınen bağlı, - Qırım tarifleri ve fiyatları boyunca Rusiye nezaretindeki devlet komitetiniñ reisi Yuriy Novosadnıñ sözlrinden yaza matbuat. - Fevralniñ 1-isinden başlap yop fiyatı 11,7%-ğa köterilecek, iyülniñ 1-inden ise daa 11,7%-ğa. Amma Qırım sakinlerini birden uslandırmaq isteyim, fiyat köterüvi deral yapılmaycaq. Aş pişirmesi, suv qızdırması ve ev isitüvi içün 3500 kubometrden azca qullanılğan "Krımgazseti" şirketi satqan tabiiy gaznıñ bir kubometri fevralden başlap 5,56 ruble olacaq (şimdi - 5,18 ruble). Ondan çoq masraf etilgen er kubometr içün 8,65 ruble tölemek kerek olacaq. Ev isitüvi ve elektrik energiyasınıñ işletip çıqarması içün qullanılğan gaznıñ fiyatı bir kubometr içün 8,48 ruble olacaq. İyülniñ 1-inden başlap aş pişirmesi, suv qızdırması ve ev isitüvi içün 3500 kubometrden azca qullanılğan gaznıñ kub metri 6,03 rublegece ösecek. 3500 kub metrden ziyadece qullanılsa, 8,7 ruble tölenecek".
"Krımskiye izvestiya" ("Qırım haberleri") gazetası "Grant şpritsiniñ içi boşadı, ve sandıraqlav başlandı" maqalesinde Meclis reisi Refat Çubarovnıñ 2020 senesi mayıs 2-sinde Qırımğa yürüşni teşkil etmek teşebbüsini tefsir ete. "O yolbaşçılıq yapqan qırımtatar meclisiniñ (Rusiyede yasaqlanğan ekstremistik teşkilât) vekilleri "Çonğar" kiriş-çıqış noqtasında sıñırnı keçecek ve böylece "halqara teşkilâtlarğa, olar Ukraina suvereniteti ve bütünligine destek eterek qabul etken qararlarnı ömürge keçirmege yardım etecek", - yaza matbuat. - Mında mıtlaqa halqara çizgisi qayd etilmeli. Kyiv qırımtatar quvğunlarına aqça bermekni toqtattı, dollar aqını da qurudı. Yahşı yaşamağa ise er kes istey. Onıñ içün sabıq tribunalar ve reberler yalıñız özlerini hatırlatmaq içün, er şey yapacaq. Amma bu siyaset degil, bu hızmettir!".
"Krımskiy telegraf" ("Qırım telegrafı") gazetası "Tanılmağan" maqalesinde Aqmescitniñ rusiyeli akimiyetiniñ teşebbüsleri aqqında yaza, şeer ealisi "olardan hoşnut ve memnüm degil, amma kimniñ işi bar". "Memurlar qararlarnı tez qabul ete ve cemiyet fikrine baqmay", - yaza matbuat. - "Misal içün, Kuybışev meydanındaki yol areketiniñ teşkil etmesi. Birinciden, iş acmini arttırmaq ve daima olğan soqaq tıqanıqlığınından vazgeçmek içün, yol areketiniñ havfsızlığı boyunca komissiya, alqada içtimaiy naqliyatnıñ turağını qapatmaq qararını aldı. Moskovskaya meydanından şeer merkezine ketken turaq közde tutula. Yaqın vaqıtta anda demir çilter qoyulacaq. Ekinciden, Kiyevskaya soqağını cayav keçitinden kecken piyadelerniñ telükesizligini temin etmek içün, kene şu komissiya onı asıl yoq etmege qararını aldı. Yani, şimdi Pionerler Sarayı tarafından "Podedı caddesi" soqağına keçmek içün, alqanı üç yerastı keçitinden aylanıp keçmek kerek. Bu qarar şeer akimiyetiniñ mevamını kene tasdıqlay: Aqmescit adamlar içün degil, maşnalar içündir", - yaza gazeta.
Maqalede ilhaq etilgen yarımadada qullanılğan ıstılaat işletile
