Link açıqlığı

Saatnıñ esas haberi

"Adamlar olarnı qorumaq kerek olğanlarnıñ elinden öle" ‒ Qırım matbuatınıñ taqrizi


Qırım matbuatı, Curçı (Pervomayskoye) rayonından adamlarnı maşnanen urıp öldürgen politsiya hadimi aqqında yaza, AQŞ ve İran vaqialarını talil ete ve Aqyardaki inşaat qavğaları aqqında tarif ete.

"Krımskaya pravda" ("Qırım aqiqatı") gazetası "Oturtmaq, oldı!" serlevalı maqalede Curçı rayonınıñ Curçı qasabasındaki yol qazası aqqında yaza, anda Rusiye polisiniñ hadimi üç piyadeni bastı. Matbuatqa köre, politsiya hadimi sarğoş edi. Qaza neticesinde bir adam elâk oldı, daa ekisi hastahanededir. Şimdi Qırımnıñ Curçı rayonı boyunca vekaletli maale polisleri bölüginiñ başı ölümnen bitken yol qazasınıñ sebepçisi olğanında qabaatlanıp tutuldı. Oña qarşı cinaiy dava açıldı. Mahkeme ükmü ile qabaatlanğan adam 2020 senesi matrnıñ 5-ine qadar ev tevqifi astına alındı. "Yazıq, amma bu adamlar olarnı qorumaq kerek olğanlarnıñ elinden ölgeniniñ yekâne adisesi degil, - dep yaza gazet. - Daa bir facialı misal 2017 senesi mart ayında oldı. O vaqıt Qırım boyunca Rusiye İİN-niñ Seyitler (Nijnegorskiy) bölüginiñ hadimi Viktoriya Marçenko 18 yaşındaki qıznı urdı, qız yaralarından elâk oldı. Bir yılğa yaqın Marçenko ev tevqifi astında tutuldı, soñunda qabaatlı tanıldı. Mahkeme oña qasaba şeklinde koloniyada dört yıllıq apis cezasını maküm etti ve eki yıl devamında aydavnen bağlı faaliyetnen oğraşmağa yasaq etti. Ağlarda adamlar çorlana: "Ne içün bu adamlar olarğa er şey mümkün dep tüşüne? İçmek, dümen başına oturmaq ve adamlarnı öldürmek ya da saqat qaldırmaq?", "Bu aqsızlıq ne vaqıt bitecek? Ne vaqıt politsiya ve memurlar adamlarnıñ öldürmesini toqtatacaq?"

"Krımskiye izvestiya" ("Qırım haberleri") gazetası muarrir sutunında "Küçük bir muzaffer cenkiniñ" qıdıruvında" maqalesinde AQŞ ve İran vaqialarını muzakere ete. Mında amerikanlar İranğa qarşı yapqan ava darbeleri ve olarnıñ neticesi olğan on adamnıñ, şu sıradan general Kasem Süleymaniniñ ölümi talil ete. Matbuat, Rusiye nezaretindeki Qırım akimiyetiniñ mebusı Yuriy Gempelniñ aytqanlarından alıntı ketire. Oña köre, "Bu qadar büyük ve aşaа bir provokatsiya yapmaq - qaplannıñ mıyıqlarından çekmek kibidir". "Qırımlılar, elbette ki, ne içün bu tamam şimdi ve tamam İranda yapılğanını tüşüne", - dep qayd ete müellif. "Bugün ekinci prezident müddetine barmaq içün Trump aynı areketlerni yapa. Böylece, Beyaz Evniñ resmiy nutuqlarını doğru ve insaniyetli ibarelernen sarğan halqara topluluq, ayrı şahıslarnıñ menfaatını tüşüne. Ve AQŞ devlet maşnası tamam şu şahıslarğa hızmet ete. Hayal etmek kerekmey", - dedi Gempel

"Krımskiy telegraf" ("Qırım telegrafı") gazetası "Mimarlıq davaları Aqyarnı açuvlata" maqalesinde şeerde çoq qatlı evlerniñ qanunsız qurulışını, Baydar uvasında litseyniñ qurulışını ve merkezde saqatlar içün kvartiralarnıñ satılmasını tasvir ete. Prokuror teşkerüvlerine köre, 73 qanunsız qurulğan çoq qatlı ev tapıldı. Qaraman şeerde çıqqan daa bir inşaat qavğası Baydar uvasında qurulacaq elit litseynen bağlı. Böyle müessiseniñ kerekligi aqqında fikirler bölündi. Bazıları, litsey yerine 600 qoranta içün kottec şeeri qurulacaq, dep tüşüne. Daa bir dava saqatlar içün reabilitatsiya mekrezinde kvartiralarnıñ satılmasınen bağlı. Onı daa 2014 yıldan evel qurıp başladılar. Bilingeni kibi, bir kvadrat metrniñ fiyatı 86 biñden 118 biñge qadardır. Buña qoşma olaraq alıcılarğa tibbiy kabinetlerniñ bar olacağını vade eteler

Maqalede ilhaq etilgen yarımadada qullanılğan ıstılaat işletile

XS
SM
MD
LG