Link açıqlığı

Saatnıñ esas haberi

"Qaranlıq ve can sıqıcı" ‒ Qırım matbuatınıñ taqrizi


Qırım gazetaları Rusiye prezidenti Vladimir Putinniñ matbuat konferentsiyası aqqında yaza ve Aqmescitniñ abadanlaştıruvınıñ neticelerini çıqara.

"Krımskaya pravda" ("Qırım aqiqatı") gazetasında "Adamlarnıñ yaşayış seviyesini yahşılaştırmaq kerek" serlevalı maqale Rusiye prezidenti Vladimir Putinniñ yekünlev matbuat konferentsiyası aqqında bildirile. Gazeta, matbuat konferentsiyası vaqtında bir çoq jurnalist "zenaat vazifelerini becermek yerine, bütün memleketke öz terbiyesizligini kösterdi" dep qayd ete. "Berilgen suallerniñ keyfiyeti pek türlü edi, demek mümkün. Tedbir iştirakçilerniñ bazıları, onı, Rusiyeniñ bir çoq sakini bilmege istegen suallerge devlet başınıñ cevabını almaq imkâniyeti kibi degil, özleriniñ numayışı imkânı kibi köre edi. Muarririyet siyasetine boysunıp, tekrar-tekrar "Golounovnıñ davası", "suveren internet" ve cetel agentinin statusı mevzularını çaynamağa mecbur olğan "liberal" denilgen dairelerniñ vekilleri soluq ve ifadesiz körüne edi. İrkutsk vilâyetiniñ "qızılları"dan birisiniñ, gubernatornıñ istifağa çıqqanınıñ semereliligini prezidentnen muzakere etmege ıntıluvı da yahşıca körünmedi. Standart nutuqlarnı ifade etken ve isteksiz "Kubandaki ukrain tanklar"nıñ aqqında fikir etken deñişmez ukrain klounı Roman Tsimbalük da can sıqıcı çıqış yaptı", - dep qayd ete "Krımskaya pravda".

"Krımskiye izvestiya" ("Qırım haberleri") da sannıñ baş maqalesini Putinniñ matbuat konferentsiyasına bağışladı. Gazeta tedbirde seslenilgen esas mevzularnı terif etti ve bu yıl matbuatnıñ maş muarriri İrina İvançenko Putinge sual berip olğanını qayd etti. O bala tibbiyeti mevzusına toqundı ve reabilitatsiyanıñ bütünley bedava yapmaq mümkün degilmi dep soradı. "Umumnen tibbiyet bedava olmalı, ve bizim deñişmelerimiz bu maqsatqa irişmekke yöneltilgen. Söz sırası, bala ölüminiñ azlaştırılmasında büyük progressni elde ettik. Ebet, balalarğa ayrı munasebet olğanını ıntılmaq kerek, biz bunıñ oğrunda çalışamız - misal içün bala retsepturalarını ayrı kategoriyağa qoydıq. Hayriyeni, televizor ekranlarında yardım muracaatlarını desek... Olarnı yasaqlamaq mümkün degil, em de bir-eki balağa olsa da, yardım pek müim, amma umumiy alğa olar pek tesir etmey, bala tibbiyetiniñ sistemasını bütünley oñartmaq kerek", - dedi Rusiye prezidenti.

"Krımskiy telegraf" ("Qırım telegrafı") gazetası "Sizifniñ emegimi?" maqalesinde Aqmescitniñ abadanlaştıruvınıñ neticelerini çıqara. "Aqşamları Aqmescit soqaqlarında kezingende, keder basa: bayram yarıqları yoq - qaranlıq ve can sıqıcı. Sanki bölgeniñ paytahtında degil, nasıldır uzaq bir köyçiktesiñ. Adamlarnıñ çoqusında bayram keyfi asıl olmağanı hucur degil. Memurlar ise begene!", - dep yaza matbuat. "Eñ parlaq leyhalardan birisi - bir qaç aydan berli yapılğan Aleksandra Nevskogo soqağınıñ temelli tamiri. İşniñ teşkil etüvi açuvlata. Soqaq tıqanıqlıqları ve içtimaiy naqliyatnıñ yaramay yürmesine baqmadan, halq tamirni añlav ile qarşıladı. Şimdi er şey artta qaldı ve adamlar sabırlarınıñ bereketini körmege azır. Amma, imtianlar daa bitmegeni belli oldı. Yalıñız şimdi yol işaretlevi başlandı. Şeer ükümeti, yollardaki vaziyetni kerginleştirmemek içün, bu işlerni gece yapacaqlarını bildirdi. Amma, yol işaretlevini - buña inanmaq bile zor - tamam qalabalıq vaqtında yapalar: aqşam saat beşten yedigece. Ne içün tamam bu vaqıt? Şimdilik cevap yoq", - dep haber ete "Krımskiy telegraf".

Matbuatnıñ malümatına köre, Gagarin soqağındaki köpür bir qaç aftadan berli qapalı. Bundan ğayrı, ğazeta, paytahtnıñ eñ büyük leyhası Salğır ve Küçük Salğırnıñ abadanlatıruvı oldı, dep yaza. Yaqınlarda şeer akimiyeti onıñ neticelerini baqtı ve işniñ esas qısmı yapıldı, dep haber etti. "Yazıq ki, memurlar yalıñız şeerniñ merkezinde olğan bir qısımnı ziyaret etti. Ya,misal içün, "Moskva" musafirhanesi ve ondan soñ olğan qısım aqqında ne derler? Mında dülberlik ve abadanlaştıruv apansızdan bite. İcracı qoranı bozıp, töşeme taşnı sıdırıp aldı, bunen de bitti", - yaza gazeta.

Maqalede ilhaq etilgen yarımadada qullanılğan ıstılaat işletile

XS
SM
MD
LG