Türkiye qırımtatarlarğa qol tutmağa devam etip, Ukraina topraq bütünligine destek köstergenini daa bir kere hatırlata. Bu aqta Türkiye Tış işler nazirliginiñ vekili Hami Aksoynıñ qırımtatar sürgünliginiñ yılına bağışlanğan beyanatında aytıla.
«Qırımnıñ tamır halqı olğan qırımtatarlar 76 yıl evel bugün (mayısnıñ 18-nde) ana vatanlarından zornen qoparılıp, insanlıq tışı şaraitlerinde sürgün etilgen edi. 250 biñ qırımtatarınıñ büyük bir qısmı sürgünlik vaqtında ya da sürgün etilgen yerlerinde can bergen edi. Qırımtatarları on yıllarnen ana vatanları olğan Qırım yarımadasına qaytıp olmağan edi. Türkiye, körgen adaletsizlikni çezerek, kimliklerini qorup, telükesizlik ve barışıq içinde yaşamaları içün keçmişte olğanı kibi bugün de qırımtatarlarğa qol tutmağa devam etecektir», – dep aytıla beyanatta.
Ukraina, Gürcistan, Estoniya, Latviya, Litvaniya ve Poloniya Tış işler nazirleri qırımtatar halqı genotsidiniñ qurbanlarını añma kününde beyanatlarını aydınlattı. Nazirler qırımtatarlarnıñ aqları oğrundaki küreşine qol tutqanlarını bildirdi.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Qırımnıñ Qurman qasabasında mayısnıñ 18-nde qırımtatar milliy areketiniñ faalleri genotsid qurbanlarını añdı: hatıra taşına çeçek qoyıp, dua oqudılar. Tedbir Rusiye quvetçileriniñ nezareti altında keçti.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
