Ukraina, Gürcistan, Estoniya, Latviya, Litvaniya ve Poloniya Tış işler nazirleri qırımtatar halqı genotsidiniñ qurbanlarını añma kününde beyanatlarını aydınlattı.
Nazirler qırımtatarlarnıñ aqları oğrundaki küreşine qol tutqanlarını bildirdi, dep aytıla Ukraina Tış işler nazirliginiñ saytında derc etilgen beyanatta.
«Sürgünlikniñ birinci yılları sürgün etilgen qırımtatarlarnıñ aman-aman yarısı vefat etti. Vatan Qırımğa qaytuv yasağı 1989 senesine qadar devam etti ve til ve medeniyet assimilâtsiyası olğan edi. Qırımtatar halqınıñ faciası 2014 senesi tekrarlandı, Rusiye Federatsiyası Ukrainanıñ ayırılmaz parçası olğan Qırımnı zapt etip, qanunsız bir şekilde ilhaq etmege tırıştı», – dep aytıla haberde.
Nazirlerniñ qayd etkenine köre, «Rusiye totalitar Stalin rejiminiñ cinaiy siyasetini devam ettirip», qırımtatarlarnı yarımadanı kene terk etmege mecbur ete.
Memleketler Rusiyeni halqara uquq bozuvlarını toqtatmasına çağıra.
«Rusiye yarımada işğalini qanunlaştırmağa ne qadar tırışsa da, bir şey deñişmey: Qırım – Ukrainadır», – dep aytıla beyanatta.
Ukraina prezidenti Volodımır Zelenskıy qırımtatar halqı genotsidiniñ yılında Rusiye işğal etken Qırım yarımadasınıñ Ukraina kontroline, qırımtatarlarnıñ ise tuvğan evlerine qaytacağına ümüt etkenini bildirdi.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
