Link açıqlığı

Saatnıñ esas haberi

Amnesty International: qırımtatarlar Rusiye akimiyetiniñ zulum nişanı ola


Amnesty International qırımtatar aq qorçalayıcısı Emir-Usein Kukuğa birdemlik mektübini yazıp, «Qırım birdemliginiñ» koordinatorı Server Mustafayevge acele yardım aktsiyasında iştirak etmege çağıra
Amnesty International qırımtatar aq qorçalayıcısı Emir-Usein Kukuğa birdemlik mektübini yazıp, «Qırım birdemliginiñ» koordinatorı Server Mustafayevge acele yardım aktsiyasında iştirak etmege çağıra

Amnesty International aq qorçalayıcı teşkilâtınıñ Ukraina bölügi Dünya tamır halqlar kününde qırımtatarlar Rusiye akimiyetiniñ zulum nişanı ola, dep hatırlata. Bu aqta teşkilâtnıñ Facebookta derc etilgen beyanatında aytıla.

«Rusiye Federatsiyası Qırım yarımadasını qanunsız alda ilhaq etken soñ, qırımtatarlar akimiyetniñ zulum nişanı ola. Qırımtatar aq qorçalayıcıları ve faalleri uydurılğan «ekstremizm» ya da «terrorizm» qabaatlavları esasında mahküm etile. Ve bugün biz öz etniklik, medeniyet, til, din aqları sıñırlanğanlarğa birdemligimizni köstermege çağıramız», – dep aytıla haberde.

Amnesty International qırımtatar aq qorçalayıcısı Emir-Usein Kukuğa birdemlik mektüplerini yazıp, «Qırım birdemliginiñ» koordinatorı Server Mustafayevge acele yardım aktsiyasında iştirak etmege çağıra.

Rusiye akimiyeti aq qorçalayıcılarnıñ beyanatını şimdilik izaatlamadı.

Prezident Zelenskıynıñ ofisi Dünya tamır halqlar kününde Qırım işğali aqqında hatırlattı. Ukraina Tış işler nazirligi Tamır halqlarnı qoruv mevzusı avgustnıñ 23-nde tesis sammiti ötkerilecek «Qırım platformasınıñ» eñ prioritetli mevzularından biri olacaq, dep qayd etti.

Avgustnıñ 9-nda Kyivde Dünya Tamır halqlar künü munasebetinen qırımtatar sürgünligi aqqında vesiqalı film kösterilecek.

Ukraina prezidenti Volodımır Zelenskıy iyülniñ 21-nde Yuqarı Rada 2021 senesi iyülniñ 1-nde qabul etken №1616-IX «Ukraina tamır halqlar» qanunını imzaladı.

Rusiye Devlet duması Ukraina Tamır halqlar qanun leyhasını takbih etken beyanatnı qabul etti. Rusiye prezidenti Vladimir Putin Ukrainanıñ tamır halqlar qanun leyhası «ruslarğa qarşı yapılğan küçlü bir darbe» ola dep, daa soñra onı tem-telef silâsınen qıyasladı.

Fevralniñ 16-nda Ukraina Yuqarı Radası halqara institutlarğa muracaat etip, Qırımnıñ Rusiye işğalini ve yarımadada insan aqları bozuvlarını takbih etmesine çağırdı. Qırımnıñ Rusiye işğaline qarşı tirenüv yılında bir sıra ğarp memleketi Rusiyege muracaat etti. Bundan soñ Kreml «ilhaq olmadı», dep bildirdi, Rusiye Tış işler nazirliginiñ spikeri Mariya Zaharova ise Qırım aqqında «olmağan şeylerni aytmaqtan» vazgeçmege çağırdı.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Qırımtatarlarnı tamır halq olaraq tanıma

2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmekte. Qırımtatar Milliy Meclisi ve Qurultayı qırımtatarlarnıñ temsiliy organları olaraq tanıldı.

Er yıl avgustnıñ 9-nda dünya tamır halqlar künü qayd etile. Onı BM Baş Assambleyası 1994 senesi tasdıqladı.

XS
SM
MD
LG