Putin Ukrainanıñ tamır halqlar qanunını «ruslarğa qarşı küçlü bir darbe» dep adlandırdı

Rusiye prezidenti Vladimir Putin Ukrainanıñ tamır halqlar qanun leyhası «ruslarğa qarşı küçlü bir darbe» ola, dep ayttı. Bu aqta o, «Rossiya-1» telekanalınıñ yayınında bildirdi.

«Tamır halqlarğa, birinci, ekinci sınıfqa bölüv ve ilâhre – natsist Almaniyasınıñ nazariyesi ve ameliyatına oşay», – dep bildire Putinniñ aytqanlarını «İnterfaks-Ukraina».

Rusiye prezidenti «qarışıq qanlı insanlar» ne yapacaq dep soradı.

«Ne yapacaqlar? Zelenskıy özü yeudi, bilmeyim, qanı qarışqan, belki. Böyle insanlar ne olacaq?… Tamır olmağan halqlarnı aytsaq, er kes içün yaramay, amma rus halqı içün ayrı manası bar», – dep ayttı Putin.

Rusiye lideri, halqara teşkilâtlar Ukrainanıñ tamır halqlar qanun leyhasına cevap bermeycek, çünki Ukrainanı dünyada daa çoq Rusiye antipodı olaraq köreler ve onı tiymemege tırışalar, dep bildirdi.

Ukraina prezidenti Volodımır Zelenskıy mayısnıñ 18-nde qırımtatar genotsidiniñ qurbanlarını añma kününde Ukraina yarımadanı kontrol altına qaytarmaq içün ğayret köstere, dep qayd etti. O, tamır halqlar qanun leyhasını parlament baqsın dep kirsetti, dep haber etken edi.

Zelenskıynıñ qayd etkenine köre, o, «Qırım platforması» sammiti ögüne qırımtatarlar ve qırımlılar içün «müim olğan» qanunlarnı imzalamağa istey, dep qayd etken edi.

İyünniñ 8-nde Rusiye Devlet Duması Ukrainanıñ qanun leyhasını takbih etken beyanatnı qabul etip, PACE ve OSCEge muracaat etmege niyetleri bar, dep bildirdi.

Yuqarı Rada deputatı, Ukrainanıñ PACE eyyetiniñ azası Rustem Umerov buña cevap berip, «iç bir memleketniñ Ukrainanıñ iç işlerine qarışmağa aqqı yoq», dep qayd etti.