Dünya tamır halqlar künü, avgustnıñ 9-nda, Cemaat meraqı jurnalistika laboratoriyası, «KrımSOS» teşkilâtı ve Qırımtatar Milliy Meclisi «Qırımğa qaytuv» vesiqalı filmini taqdim etecekler. Tedbir Mariyınskıy sarayında 21:00-da keçirilecek. Bu aqta teşkilâtçılar Facebookta haber ete.
Saat 19:30-da «Tamır halqnıñ statusı: «Tamır halqlar» qanunı Qırımnı Ukrainağa qaytaruv içün ne ifadeley» munaqaşa meydançığı keçirilecek.
Subet yañı qanun memleket içinde nasıl çalışacağına, devletniñ Qırımnı halqara alanğa qaytaruv ceetinden olğan emiyeti, Ukrainadaki etnikara munasebetlerniñ yañı şekline bağışlanacaq.
Munaqaşada film müellifleri ve qaramanları, qırımtatar halqınıñ liderleri, vatandaş cemiyeti ve Ukraina akimiyetiniñ vekilleri iştirak etecek.
Tedbirni «Ukrayınska pravda» neşiriniñ baş muarriri Sevgil Musayeva idare etecek. Vaqiada #PrisonersVoice ve #ÇekayemoVdoma kampaniyalarına qoşula bile.
Çoqusı qırımtatarı olğan siyasiy mabüsler içün varqalarnı #PrisonersVoice kampaniyasınıñ mahsus diregi yanında imzalamaq mümkün.
Ukraina prezidenti Volodımır Zelenskıy iyülniñ 21-nde Yuqarı Rada 2021 senesi iyülniñ 1-nde qabul etken №1616-IX «Ukraina tamır halqlar» qanunını imzaladı.
Rusiye Devlet duması Ukraina Tamır halqlar qanun leyhasını takbih etken beyanatnı qabul etti. Rusiye prezidenti Vladimir Putin Ukrainanıñ tamır halqlar qanun leyhası «ruslarğa qarşı yapılğan küçlü bir darbe» ola dep, daa soñra onı tem-telef silâsınen qıyasladı.
Qırımtatarlarnı tamır halq olaraq tanıma
2014 senesi martnıñ 20-nde Ukraina Yuqarı Radası qırımtatarlarnı Qırımnıñ tamır halqı dep tanıdı. Bu qararğa 283 halq deputat rey berdi. Ukraina qırımtatar halqınen diger milliy azlıqlarnıñ Ukrainanıñ tamır halqı olaraq etnik, medeniyet, til ve din kimliginiñ saqlap qalması ve inkişafını kefil etmekte. Qırımtatar Milliy Meclisi ve Qurultayı qırımtatarlarnıñ temsiliy organları olaraq tanıldı.
Er yıl avgustnıñ 9-nda dünya tamır halqlar künü qayd etile. Onı BM Baş Assambleyası 1994 senesi tasdıqladı.
