Aqmescit №1 SİZO-sınıñ sağlıq bölüminde bulunğan qırımtatar faali Edem Bekirov, iyül 31-inde Yañı Qapığa (Krasnoperekopsk) etap etilecegi taqdirde açlıqnı ilân etmek ve ilâclardan vazgeçmek niyeti aqqında ariza yazdı. Bu aqta, kopiyası Qırım.Aqiqat elinde olğan, arizada bildirile.
"Aqmescitniñ Merkeziy rayon mahkemesi, cinaiy davamnıñ Yañı Qapı rayon mahkemesine yollanması aqqında qarar çıqardı. Yañı Qapığa ulaştıruv, SİZOda tutuluv, er kün mahkemege ketirilüv men içün azaplı ölüm kibidir. Hastalığımnen bu köçmelerge ve SİZOda tutuluvğa dayanıp olamaycağımı añlayım. Onıñ içün №1 Aqmescit SİZOsında açlıqtan ölüm menim içün daa ağırsız olur. Bundan sebep, meni Yañı Qapuğa avuştırmağa ıntılsalar, men açlıqnı ilân etecegim aqında resmiy bildirem", - denile Bekirovnıñ beyanatında.
Advokat Aleksey Ladinniñ aytqanına köre, avgustnıñ 2-sinden soñ Qırım Yuqarı mahkemesi, Bekirovnıñ cinaiy davasını Yañı Qapı rayon mahkemesine yollamaq, Aqmescit rayon mahkemesiniñ qararına imayeniñ apellâtsiya şikâyetini baqacaq.
"Bu qarar (açlıqnı ilân etmek) - onıñ (Bekirovnıñ - QA) nazı olmağanını añlamaq kerek. O, SİZOdan mahkemege devamlı etaplarğa dayanıp olamaycağını yahşı añlay. Bu da ölüm olacaq, amma daa çekiştirici soyu. Onıñ içün o, narazılıqnıñ bu usulını saylay. Onı Yañı Qapığa avuştıracaq olsalar, o, prokuror ve SİZO başlığı adlarına eki resmiy arizanı azırlaycaq. Bu malümatnı o tünevin (iyül 30 - QA) onı SİZOda yoqlağan ombudsmen Lüdmila Lubinağa ağzaviy şekilde aytıp berdi", - dep qoştı advokat.
Daa evel, Aqmescitniñ №1 SİZOsınıñ tibbiy bölüginde tutulğan qırımtatar faali Edem Bekirov omurğa siñiri sıqılğanı içün on kün töşekten turmağanı, bildirilgen edi.
Daa evel haber etilgeni kibi, Bekirovnıñ cinaiy davası Aqmescitteki rus mahkemesinden Krasnoperekops rayon mahkemesine yollanıldı.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
