Link açıqlığı

Saatnıñ esas haberi

Avropa insan aqları mahkemesi qırımtatar faali Edem Bekirovnı hastahanege yatqızmaq qararını qabul etti – advokat


Qırımtatar faali Edem Bekirov ve advokatı İslâm Velilâyev
Qırımtatar faali Edem Bekirov ve advokatı İslâm Velilâyev

İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.

Bekirovnıñ advokatı İslâm Velilâyevniñ aytqanına köre, «bu qarar beklenmegen edi, amma bu vaziyette tamamen doğru ola».

«Men advokat olaraq bu qararnı Edem ağa Bekirovnıñ davası boyunca tahqiqatçığa ve İnsan aqları vekâletlisi Tatyana Moskalkovağa yollaycam. Tahqiqatçı seslenmese, men mahkemege muracaat etmege mecbur olacam. Yarım yıldan berli advokatlar müvekkilimiz SİZOda öle, dep ayta. Ve er kün müim», – dep ayttı Qırım.Aqiqatqa advokat.

Edem Bekirovğa nisbeten qullanılğan Avropa insan aqları mahkemesi reglamentiniñ 39-ıncı qaidesine binaen, Rusiye akimiyeti onı apishanege ait olmağan hastahanege acele yatqızmağa mecbur.

Aqmescit mahkemesi Edem Bekirovnıñ apis cezasını daa eki ayğa uzattı. O, avgustnıñ 12-ne qadar SİZOda qalacaq.

Mayısnıñ 28-nde Bekirovnıñ advokatı İslâm Velilâyev müvekkilini Aqmescit SİZOsında ziyaret etip, sağlıq vaziyeti kritik fenalaşqanını bildirdi. Velilâyevniñ aytqanına köre, yürek, baş ağrıları, mide astı bezi problemleri, ayaqlarnıñ üyüşüvi, yüksek qan basımı ve yüksek qan şekerinden ğayrı, boğulmağa ve qannen öksürmege başladı.

Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.

Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.

XS
SM
MD
LG