Kreml kontrolindeki Aqmescit Kiyev rayon mahkemesiniñ qadısı Anton Tsikurenko silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirovnıñ tahqiqat izolâtorında tutuluv müddetini eki ayğa uzattı. O, 2019 senesi avgustnıñ 12-ne qadar nezaret altında qalacaq. Bu aqta Qırım.Aqiqat mühbiri haber ete.
«Qabaatlayıcı tarafı ve imaye arasında bir muvazenet ola bilecek mahkemeniñ yekâne qanuniy qararı tahqiqatnıñ SİZOda qaldırmaq muracaatını qanaatlendirmemek ve ev apsi qararını qabul etmek olacaq edi. Bugünki qarar müvekkilimniñ ayatı içün telükeli ola», – dep bildirdi advokat Aleksey Ladin.
FSB tahqiqatçısı İvan Romanets Bekirovnıñ sıñırlav tedbiriniñ uzatılması «yerde eñ az üç teşkerüv yapmaq», Bekirovğa soñki qabaatlavnı bermek ve qabaatlanğan kişi olaraq sorğuğa çekmek, em de Bekirovğa ve imayesine tahqiqat tedbirleri yekünlengenini bildirmek ihtiyacınen bağlı, dep bildirdi.
«Ümüt etemiz ki, tahqiqat bu tahqiqat tedbirlerini faal sürette keçirecek. Belki, bir-eki aftadan soñ tahqiqat tedbirleri yekünlengenini bildirirler ve bizler dava malümatlarını ögrenip başlarmız. Dava mahkemege ne qadar tez kirse, o qadar erte sıñırlav tedbiriniñ deñiştirilüvini rica etecekmiz», – dep qoştı advokat İslâm Velilâyev.
Tahqiqatçı Romanets Bekirovnıñ SİZOda tutulmasına mania olğan tibbiy sebeplerge dair malümatı olmağanını ve sıñırlav tedbiriniñ lâğu etilüvi içün sebep olmağanını bildirdi.
«Qabaatlavnen küreşmekten boldurdım. Bu daa ne qadar devam etecek? Taqatım qalmadı! SİZOda yaşamayım; kezmege çıqarmaylar – şarait yoq, amamğa çıqarmaylar. Bağışlañız, amma unitaz üstünde yuvunam – XXI asırda bular insanca tutuv sayılamı?», – dep ayttı Bekirov mahkemede.
Oturışuv vaqtında qollarında yazuvlı kâğıt bar edi: «Başta gençler. Soñra qartlar. Şimdi qadınlar. Daa kimler olacaq? Balalarmı?». Bu şekilde o, tutulğan ve içtimaiy ağlardaki paylaşuvlar içün para cezasını alğan qırımtatar aq qorçalayıcısı Lutfiye Zudiyeva ve «Qırım balalığınıñ» koordinatorı Mümine Saliyevağa birdemlik kösterdi.
Mayısnıñ 28-nde Bekirovnıñ advokatı İslâm Velilâyev müvekkilini Aqmescit SİZOsında ziyaret etip, sağlıq vaziyeti kritik fenalaşqanını bildirdi. Velilâyevniñ aytqanına köre, yürek, baş ağrıları, mide astı bezi problemleri, ayaqlarnıñ üyüşüvi, yüksek qan basımı ve yüksek qan şekerinden ğayrı, boğulmağa ve qannen öksürmege başladı.
Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
