Aqmescitniñ №1 SİZOsınıñ tibbiy bölüginde tutulğan qırımtatar faali Edem Bekirov omurğa siñiri sıqılğanı içün on kün töşekten turmay edi. Bu aqta advokat İslâm Velilâyev Qırım.Aqiqat mühbirine bildirdi.
Onıñ aytqanına köre, bu vaqıt devamında Bekirovğa ağrı kesici ineleri yapıla edi.
«Siñiri ciddiy sıqılğan edi. Şu sebepten on kün turmay, töşekte yata, ayaqyolğa zornen bara edi. Oña ağrı kesici ineleri yapılğan edi. Bugünki künde tura, yüre. Amma hastalığı (omurğa siñiriniñ sıqılması) tüzetilmedi, ağrısı kesildi. Bundan ğayrı, insulin dozası arttırıldı. Qan basımı yüksek, boğula», – dedi advokat.
Tünevin, iyülniñ 29-nda, Bekirovnı Qırımdaki Rusiye insan aqları vekâletlisi Lüdmila Lubina ziyaret etti.
«Onı Qırım ombudsmeni Lüdmila Lubina ve advokat Emine Avamileva ziyaret ettiler. Lubinağa şöyle dedi: dava Krasnoperekopskqa yollanılsa, o, narazılıq olaraq açlıqnı ilân etecek ve bir yerge barmaycaq», – dedi Velilâyev.
Daa evel haber etilgeni kibi, Bekirovnıñ cinaiy davası Aqmescitteki rus mahkemesinden Krasnoperekops rayon mahkemesine yollanıldı.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
