Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmay.
Bu aqta advokat Aleksey Ladin Qırım.Aqiqat mühbirine bildirdi.
İmaye, FSB tahqiqatçısına Avropa makhemesiniñ Bekirovnen bağlı qararını yerine ketirüv muracaatını yolladı.
«Tahqiqatçı Bekirovnı hastahanege çıqarmaq içün sebep körmegenini ayttı. Avropa insan aqları mahkemesiniñ qararı qarar degil de, kerekli şekilde tasdıqlanmağan mektüp ola, resmiy kanallar boyunca oña bir de bir malümat kelmedi, dep bildirdi. Bundan ğayrı, Bekirov hastahanege endi çıqarılğan edi, tahqiqatçılarnıñ fikirince, kerekli tibbiy teşkerüv yapılğan eken, ekimlerniñ qararı bar, oña köre, Bekirov SİZOda tutula bile, dep ayttı tahqiqatçı», – dedi advokat.
Ladinniñ aytqanına köre, o, böyle olacağını tahmin etip, Rusiyeniñ resmiy organlarına bir sıra ariza berdi.
«Qırım insan aqları vekâletlisi Lüdmila Lubina, Moskvadaki reberligi — ombudsmen Tatyana Moskalkova, Qırımdaki FSB idaresiniñ reberligi —general-leytenant Mihaylük, FSB müdiri, Adliye nazirligi, Rusiye prezidenti yanındaki apparat, Rusiye ükümeti, SİZO ve Rusiyeniñ Cezalarnı yerine ketirüv federal hızmetine arizalar berdim. Bu arizalarda AİAM qararını yerine ketirüvde yardımcı olmalarını isteyim», — dep ayttı Ladin.
Advokat, tahqiqatçılarnıñ Avropa mahkemesiniñ qararını yerine ketirmekten vazgeçüvi İnsan aqlarını qoruv şartnamesiniñ diger maddelerini bozacaq, dep hatırlattı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
