Rusiye kontrolindeki Aqmescitniñ Merkeziy rayon mahkemesiniñ qadısı Aleksandr Voronoy qırımtatar faali Edem Bekirovnıñ cinaiy davasını Qırımnıñ Krasnoperekopsk rayon mahkemesine yolladı. Bu aqta Qırım.Aqiqatta olğan mahkeme qararınıñ kopiyasında aytıla.
Qararğa köre, Bekirovnıñ davası Krasnoperekopskta baqılmalı, çünki Rusiye FSBsiniñ hadimleri silâ ve patlayıcı maddeler saqlanğan yerni anda tapqan eken.
«Cinayet bitken yer silâ ve patlayıcı tapılğan yer, saqlanğan yer ola… Risovoye köyünden cenüpke doğru 5 kilometr mesafede. Bekirov qabaatlanğan cinayetlerniñ yeri Qırımnıñ Krasnoperekopsk rayonında yerleşe, şu sebepten bu davanı Qırımnıñ Merkeziy rayon mahkemesi baqamaz», – dep aytıla mahkeme qararında.
İmaye, bu qararğa qarşı temyiz arizasını berdi, çünki davadaki mahkemelik yañlış olğanını tüşüne.
«Bekirov evelden añlaşılğan silâ ve patlayıcılarnı saqlağanında qabaatlana. Tahqiqat bile cinayet saqlavda yekünlengenini bildire, şu sebepten qadınıñ cinayet silâ ve patronlar (Risovoye köyü rayonında – QA) alınğan soñ yekünlendi kibi delilleri boş ola, tahqiqat da Bekirov yasaqlağan maddelerniñ avuştırılğanını bilmey edi», – dep aytıla advokat Aleksey Ladinniñ şikâyetinde.
Bekirovnıñ özü advokatnen laf etip, dava Krasnoperekopskta baqılsa, SİZO kamerasından çıqmaycaq, dep ayttı.
«O, avtozaknıñ işkence şaraitlerinde yolğa dayanamaz, dep ayttı, em de Krasnoperekopskta vaqtınca tutuv izolâtorı yoq, eñ yaqını ise Ermeni Bazarda yerleşe. Vaqtınca tutuv izolâtorında qalsa bile, yaşaycaq şaraitleri uyğun degil. Edem Bekirov bütün telükelerni añlap, Krasnoperekopskqa ketmek içün kameradan çıqmaycağını bildirdi, çünki bu yol ölümnen bir ola. O, narazılıq bildirmek içün özüni yataqqa bağlamağa azır», – dedi Ladin.
Rusiye ombudsmeni Tatyana Moskalkova Kreml kontrolindeki Aqmescit Kiyev rayon mahkemesi apiske alınğan qırımtatar faali Edem Bekirov içün sıñırlav tedbirini Aqmescit SİZOsında tutuv yerine ev apsini belgilemesini «ister edi», dep ayttı Qırım.Aqiqat muhbirine.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
