Rusiye FSBsi tarafından patlayıcı maddelerni qanunsız azırlağanında ve saqlağanında qabaatlanğan qırımlı aq qorçalayıcı Yunus Maşaripov Rusiye kontrolindeki Yalta şeer mahkemesinde yanvarniñ 16-nda işkencege oğratılğanını bildirdi.
Bu aqta Yunus Maşaripovnıñ advokatı Aleksey Ladin Qırım.Aqiqat mühbirine ayttı.
Advokatnıñ bildirgenine köre, qapalı keçirilgen mahkeme oturışuvında Maşaripov ve tahqiqat areketlerinde iştirak etken eki FSB hadimi sorğuğa çekildi.
«Yunus oña qarşı yapılğan işkence aqqında tarif etti. Onıñ aytqanına köre, FSB hadimleri onı aqım, açıq ateşnen qıynap eziyetlediler, qabaatı olğanını tanımasını talap ettiler. Soñra genetik madde alıp, bunı bir yerde qayd etmediler. Ve daa soñra genetik madde patlayıcı maddede tapıldı», – dep ayttı Aleksey Ladin.
Advokat, cinayet yerini baquv protokolında olğan uymamazlıqlarnı qayd etti.
«İnsanlar patlayıcı olğan yerni baqmağa keteler, yani telükesizlik tedbirleri alınmalı, patlav tehniki olmalı. Olar ise cemaat vekillerinen ketti, garajnı açtı, andan detonator, patlayıcı çıqarğanlar. Garajnı ürsünen açtılar, yani patlaması mümkün olğan patlayıcı madde olğanını bilip, garaj qapusını ürsünen açtılar. Yunusnıñ aytqanına köre, patlav tehniki bar edi, amma turıp, er şeyni kamerağa çıqarğan edi», – dep qayd etti advokat.
Rusiye kontrolindeki Yalta şeer mahkemesi 2019 senesi dekabrniñ 16-nda Rusiye FSBsi tarafından patlayıcı maddelerni qanunsız yapqanında ve saqlağanında qabaatlanğan aq qorçalayıcı Yunus Maşaripovnıñ cinaiy davasını tekrar temelden baqmağa başladı.
Maşaripov 2017 senesi sentâbr ayında tutulıp apiske alındı. Aq qorçalayıcılarnıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
«Krım 24» akimiyetke qoltutqan Qırım telekanalı FSBniñ aq qorçalayıcını çekken sorğu videosını derc etti. Sorğu vaqtında Maşaripov, «Yaltada içtimaiy-siyasiy vaziyetke dair malümat toplağanını, turistik mevsimni bozmaq içün plâjlarda ine atqanını, ormannı ateşke bergenini ve Rusiyege qarşı risalelerni tarqatqanını» tarif etti. Videoda aytılğanı kibi, Maşaripov bunı «Qırımtatar Milliy Meclisiniñ teşebbüsinen yaptı, onı ise Ukraina telükesizlik hızmetiniñ hadimleri idare etti».
Meclis reisi Refat Çubarov Qırım.Aqiqatqa bu malümatnı red etti.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.
