Ukraina Tış işleri nazirligi (TİN) Rusiyeden, Qırımda tevqif etilgen ve Aqmescit tahqiqat izolâtorında sağlıq ile zorluqlar çekken qırımtatar faaliyetçisi Bekir Degermenciniñ azat etilmesini talap ete. Yanvarniñ 12-sinde Twitterde TİN sözcüsi Maryana Betsa munasip bildirüv yaptı.
Bildirüvde: «Degermenciniñ sağlığı kritik vaziyette. İşğalci, qırımtatarlarnı öldürmege devam ete. Rusiyege narazılıq bildire, azat etmesini talap etemiz», – denile.
Yanvarniñ 12-sinde Advokat Edem Semedlâyev Qırım.Aqiqatqa, Qırımda tevqif etilgen qırımtatar faaliyetçisi Bekir Degermenci sağlığınıñ vaziyeti sebebinden tahqiqat izolâtorında bulunıp olamay, dep bildirdi. Advokat, imayesi altında bulunğannıñ sağlıq vaziyetine «kritik» dep, Qırımdaki mahkemeniñ, bunı tasdiqlağan munasip tıbbiy vesiqalarnı köz ögüne almağanını qayd etti.
Yanvarniñ 12-sinde Kremlniñ kontroli altında bulunğan Aqmescitteki Kyiv rayonı mahkemesi «Veciye Kaşka işi» figurantlarına apis muddetini eki ayğa uzattı.
Bekir Degermencide sürekli astma bar. Tahqiqat izolâtorında sağlığınıñ vaziyeti birden yamanlaştı. Dekabrniñ 6-sında Kremlniñ kontroli altında bulunğan Qırım Yuqarı mahkemesiniñ zalında faaliyetçige «acele yardım» çağırıldı. Dekabrniñ 14-ne keçer gecesinde o, reanimatsiyağa tüşti.
Dekabrniñ 20-sinde Aliye Degermenci, aqayınıñ reanimatsiyadan keçirilgenini ve pulmonologiya bölügi tolu olğanı içün bu bölükniñ koridorında yerleştirilgenini bildirdi. Daa soñra Degermencini tahqiqat izolâtorına qaytardılar.
2017 senesi noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apis etti.
