Qırımda tevqif etilgen qırımtatar faaliyetçisi Bekir Degermenci sağlığınıñ vaziyeti sebebinden tahqiqat izolâtorında bulunıp olamay. Bunı yanvarniñ 12-sinde Qırım.Aqiqat içün bergen izaatta qabaatlanğannıñ advokatı Edem Semedlâyev bildirdi. Advokat, imayesi altında bulunğanınıñ sağlıq vaziyetine «kritik» dedi.
Semedlâyev: «Sağlığınıñ vaziyeti, elbette, endişeler doğura. Bunı em köznen körmek mümkün, em de spravkalar onıñ sağlığı kritik vaziyette bulunğanını ve onı tahqiqat izolâtorında tutmağa olmağanını köstereler. Lâkin mahkeme bu spravkalarnı köz ögüne almadı», – dedi.
Yanvarniñ 9-nda Bekir Degermencige tahqiqat izolâtorına kerekli ilâclar alıp berdiler.
Yanvar 12 cuma kününde Kremlniñ kontroli altında bulunğan Aqmescitteki Kyiv rayonı mahkemesi «Veciye Kaşka işi» figurantlarınıñ apis müddetini uzattı.
Bekir Degermencide sürekli astma bar. Tahqiqat izolâtorında sağlığınıñ vaziyeti birden yamanlaştı. Dekabrniñ 6-sında Kremlniñ kontroli altında bulunğan Qırım Yuqarı mahkemesiniñ zalında faaliyetçige «acele yardım» çağırıldı. Dekabrniñ 14-ne keçer gecesinde o, reanimatsiyağa tüşti.
Dekabrniñ 20-sinde Aliye Degermenci, aqayınıñ reanimatsiyadan keçirilgenini ve pulmonologiya bölügi tolu olğanı içün bu bölükniñ koridorında yerleştirilgenini bildirdi.
2017 senesi noyabrniñ 23-nde Aqmescitte Rusiye telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apis etti.
