Link açıqlığı

Tevqif etilgen qırımtatar faaliyetçisi Degermencige kerekli ilâclar alıp berildi – zevcesi


İlhaq etilgen Qırımda tevqif etilgen qırımtatar faaliyetçisi Bekir Degermencige Tahqiqat izolâtorına kerekli ilâclar alıp berildi. Bunı yanvarniñ 10-nda Qırım.Aqiqat içün bergen izaatlarda Bekir Degermenciniñ apayı Aliye ikâye etti.

Aliye Degermenci: «Yanvarniñ 2-sinde o, pulmonologiyadan (Tahqiqat izolâtorına – QA) alınğan soñ men onıñ sağlığı ne vaziyette olğanı aqqında bir şey bilmeyim. Tünevin (yanvarniñ 9-nda – QA) biz oña pulmonologiya bölüginde tayin etilgen bütün kerekli ilâclarnı berdik. Şimdi anda ilâclar ile problermler yoq», – dedi.

Onıñ aytqanına köre, şimdi Bekirge er kün arterial basım talilleriniñ kontrol etilmesi kerek, lâkin Tahqiqat izolâtorında bulunğanı içün «bunı kontrol etmek qıyın olacaq».

Dekabrniñ 20-sinde Aliye Degermenci, aqayınıñ reanimatsiyadan keçirilgenini ve pulmonologiya bölügi tolu olğanı içün bu bölükniñ koridorında yerleştirilgenini bildirdi.

Qırımtatar milliy areketiniñ faaliyetçisi Bekir Degermenci noyabrniñ 23-nde diger qırımtatar faaliyetçileri ile beraber aqsız yerde para talap etüvde qabaatlanıp, tevqif etildi.

Bekir Degermencide sürekli astma bar. Tahqiqat izolâtorında sağlığınıñ vaziyeti birden yamanlaştı. Dekabrniñ 6-sında Kremlniñ kontroli altında bulunğan Qırım Yuqarı mahkemesiniñ zalında faaliyetçige «acele yardım» çağırıldı. Dekabrniñ 14-ne keçer gecesinde o, reanimatsiyağa tüşti.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG