Link açıqlığı

Qırımtatar faaliyetçisi Bekir Degermencini reanimatsiyadan pulmonologiya koridorina keçirdiler – apayı


Aliye Degermenci, videoalâqada bulunıp, aqayı Bekir Degermencisiniñ sağlıq vaziyeti aqqında ikâye ete, Kyiv, 2017 senesi dekabr 20 künü

Qırımda tevqif etilgen qırımtatar faaliyetçisi Bekir Degermencini reanimatsiyadan pulmonologiya bölügine keçirdiler. Lâkin bölükte yer olmağanı içün onı koridorda qaldırdılar. Qırım.Aqiqat muhbiri, bunı Bekir Degermenciniñ apayı ikâye etkenini bildirdi.

Kyivde Degermenciler qorantasına qor tutmaq maqsadınen ötkerilgen tedbirde Aliye Degermenci: «Al-azırda Bekir reanimatsiya blokundan pulmonologiya bölügine keçirildi. Vaziyeti stabil ağır. Bugün ekimnen laf etmege mecbur oldım. Onıñ pek zayıf olğanını dediler. İne yapmağa devam eteler. Pulmonologiyada yer olmağanı içün o koridorda, perde artında buluna. Onı üç saqçı qaravullay», – dep ikâye etti.

Onıñ aytqanına köre, şimdi Bekir Degermencini, aqciger şişikligini alıp taşlamaq içün tedaviyleyler.

Dekabrniñ 20-sinde Kyivdeki «Qırım evi» merkeziniñ binasında yarımadada tevqif etilgen qırımtatar faaliyetçileri Mustafa ve Bekir Degermenciler ile birdemlik aqşamı keçe. Tedbirde cemiyet faaliyetçileri, aq-uquq qoruyıcıları ve Qırımtatar Milliy Meclisiniñ liderleri iştirak eteler.

Mustafa Degermenci – «Fevral 26 işi» figurantlarından biri. O, 2014 senesi fevralniñ 26-sında Aqmescitte Ukrainanıñ topraq bütünligine qol tutmaq maqsadınen yapılğan tedbir vaqtındaki kütleviy qarışıqlıqlarda iştirak etkeninde qabaatlanıp, 2015 senesi mayısnıñ 7-sinde tevqif etildi. Eki yıl apiste bulunğan soñ 2017 senesi aprelniñ 6-sında ev apisine keçirildi.

Bekir Degermenci – Mustafanıñ babası, qırımtatar milliy areketiniñ faaliyetçisidir. O, 2017 senesi noyabrniñ 23-nde diger qırımtatar faaliyetçileri ile beraber aqsız yerde para talap etüvde qabaatlanıp, tevqif etildi.

Degermencilerniñ büyüginde sürekli astma bar. Muvaqqat izolâtorda sağlığınıñ vaziyeti birden yamanlaştı. Faaliyetçi, dekabrniñ 6-sında Kremlniñ kontroli altında bulunğan Qırım Yuqarı mahkemesiniñ zalında yaramadı. Oña «acele yardım»nı çağırdılar. Dekabrniñ 14-nde o, reanimatsiyağa tüşti. Daa soñra, ekimlerniñ Degermencini esas olaraq ilâclar tesirindeki tıbbiy yuquda tutqanları belli oldı.

Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.

XS
SM
MD
LG