Ukraina Tışqı işler nazirligi (MİD) Rusiyeden işğal etilgen Qırımda qırımtatarlarnıñ diskriminatsiyasını toqtatmağa talep ete. Ukrain müessisesi bunı, oktâbrniñ 2-nde yarımadada ötkerilgen tevqif etüvler munasebetinen beyan etti.
«NKVD tecribesinen sınalğan tintüv ve tevqif etüvler. RF-dan qırımtatarlarnıñ diskriminatsiyasını toqtatmağa talap etemiz», – dep yazdı Twitterde Ukraina MİD matbuat kâtibi Maryana Betsa.
Bazarertesi künü, oktâbrniñ 2-nde, Aqmescit rayonınıñ Yaşlıq (Molodejnoye) qasabasında qırımlı Renat Suleymanovnıñ evinde maskalı insanlar tintüv keçirdi.
Bunen beraber Rusiye silâlı hızmetleri Qarasuvbazar rayonında Terekli Şeyh Eli (Melniçnoye) koyüniñ 64 yaşındaki sakini Talât Abdurahmanovnıñ evinde tintüv ötkerip, namalüm (belli olmğan) tarafqa alıp ketti.
Qırımlı advokat Edem Semedlâyev oktâbrniñ 2-nde, rus silâlı hızmetçileri üç adamnı tuttı, dep haber etti. Bular: Renat Suleymanov, Ersen Kubedinov, Seyran Mustafayev.
Kremlge tabi olğan Qırım milletlerara munasebetler komitetiniñ reisi Zaur Smirnov, istilâ etilgen Qırımda «Teblig Cemaatı» musulman teşkilâtınıñ üç üceyresi yoq etilgeni aqqında beyan etti.
Qırım.Aqiqat yüz bergen adiselerniñ tafsilâtını ögrenmegetırışa.
«Tebliğ Cemaatı» – siyasetten çette turğan diniy areket. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – keniş eali arasında islâmiy maneviy deñişmeler yapmaq ve, içtimaiy ya da iqtisadiy vaziyetine baqmadan, bütün musulmanlarğa hitab etmektir. 2009 senesi Rusiye Aliy mahkemesi bu teşkilâtnı ekstremistik olaraq tanıdı ve faaliyetini yasaqladı.
Qırım yarımadası Rusiye tarafından istilâ etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa keçile. Uquq qorçalayıcılar bunı «uyğunsız fikirlerge qarşı kureş» kibi tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
