Rusiye silâlı hızmetleri oktâbrniñ 2-nde Qarasuvbazar rayonında Terekli Şeyh Eli (Melniçnoye) koyüniñ 64 yaşındaki sakini Talât Abdurahmanovnıñ evinde tintüv ötkerip, namalüm (belli olmğan) tarafqa alıp ketti. Bunı Qırım.Aqiqatqa Qırım kontakt gruppasınıñ koordinatorı Abdureşit Cepparov haber etti.
«Maña malüm etilgeni kibi, bügün saba saat 6-da 64 yaşındaki Talât Abdurahmanovnıñ evine maskalı adamlar kirdi. Olarnıñ sayısı büyük edi. Ev saibini özünen beraber alıp kettiler, bese-belli Aqmescitke. O din kütken musulmandur. Şimdi vaqia yüz bergen yerge ketem», – dedi uquq qorçalayıcı.
Advokat Edem Semedlâyev bügün, oktâbrniñ 2-nde haber etti ki, Aqmescit rayonınıñ Yaşlıq (Molodejnoye) qasabasında qırımlı Renat Suleymanovnıñ evinde maskalı insanlar tintüv keçirdi ve onı belli olmağan yerge alıp ketti.
Rusiye uquq qoruyıcı qurulışları bunıñnen bağlı bir malümat bermey.
Qırım yarımadası Rusiye tarafından istilâ etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa keçile. Uquq qorçalayıcılar bunı «uyğunsız fikirlerge qarşı kureş» kibi tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
