Link açıqlığı

Qırımda «Tebliğ Cemaatınıñ» üceyreleri yoq etilgeni aqqında beyan etile


İstilâ etilgen Qırımda «Teblig Cemaatı» musulman teşkilâtınıñ üç üceyresi yoq etilgeni aqqında beyan etile. Bunı oktâbrniñ 2-nde Kremlge tabi olğan Qırım milletlerara munasebetler komitetiniñ reisi Zaur Smirnov bildirdi, dep haber ete «RİA Novosti».

«Tebliğ Cemaatı» üceyreleri Aqmescit ve Qarasuvbazar rayonlarında, ve Aqmescitte çalışa edi. Bir-qaç adam tutıldı», – dedi Smirnov.

Onıñ sözlerine köre, rus silâlı hızmetçileri ameliy-taqiqat areketlerni devam ete.

Bu tedbirler Aqmescit rayonındaki Yaşlıq (Molodejnoye) qasabasında qırımlı Renat Suleymanovnıñ evindeki tintüvnen ya da Qarasuvbazar rayonında Terekli Şeyh Eli (Melniçnoye) koyüniñ 64 yaşındaki sakini Talât Abdurahmanovnıñ tutılmasınen bağlımı, yoqmı şimdilik malüm degil.

Qırım.Aqiqat yüz bergen adiselerniñ tafsilâtını ögrenmegetırışa.

«Tebliğ Cemaatı» – siyasetten çette turğan diniy areket. 1926 senesi İndistanda Mevlâna Muhammed İlyas tarafından tesis etilgen edi. Areketniñ esas maqsadı – keniş eali arasında islâmiy maneviy deñişmeler yapmaq ve, içtimaiy ya da iqtisadiy vaziyetine baqmadan, bütün musulmanlarğa hitab etmektir. 2009 senesi Rusiye Aliy mahkemesi bu teşkilâtnı ekstremistik olaraq tanıdı ve faaliyetini yasaqladı.

Qırım yarımadası Rusiye tarafından istilâ etilgen soñ, yarımadada FSB tarafından muntazam surette jurnalistler, failler, cemaatçılar tintile ve sorğuğa keçile. Uquq qorçalayıcılar bunı «uyğunsız fikirlerge qarşı kureş» kibi tanıy.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG