Aqmescitte Qırımdaki Rusiye FSBsiniñ binası ögünde tutulğanlar arasında qırımtatar faali Zair Smedlâ bar. Bu aqta o, Facebook saifesinde haber etti.
Smedlâ tutulğanını Qırımtatar Milliy Meclisiniñ reisi Refat Çubarov da bildirdi. Onıñ malümatına köre, Rusiye quvetçileri qırımtatar milliy areketiniñ faali Lemmar Yunusovnı da tutıp aldı.
«Rusiye Federatsiyası tarafından işğal etilgen Qırımda narazılıq bildirgen qırımtatarlar tolu polis avtobusı ve tutulğanlar mindirilgen avtozak «Qırımdaki Rusiye Federatsiyasınıñ FSB idaresi» olğan Franko soqağından çıqtı», – dep yazdı Çubarov Facebook saifesinde.
Aq qorçalayıcı ve «Qırım birdemliginiñ» faali Lutfiye Zudiyeva Aqmescitteki Rusiye FSBsiniñ binası ögünde tutulğan qırımtatarlar cedvelini Facebookta derc etti.
Hatırlatamız, sentâbrniñ 4-nde Aqmescitte Qırımdaki Rusiye FSBsi idaresiniñ binası ögünde Rusiye quvetçileri tahminen 40 insannı tuttı. Qırımtatar Milliy Meclisiniñ reisi Refat Çubarovnıñ bildirgenine köre, tutulğan qırımtatarlar sentâbrniñ 3-4-nde yarımadada Rusiye quvetçileri tarafından tutulğan beş qırımtatarınıñ taqdiri aqqında malümat almağa tırıştı.
FSB, Aqmescitteki tutuvlar ya da sentâbrniñ 3-4-nde Qırımda olıp keçken tintüvler aqqında malümatnı resmiy şekilde tefsir etmey.
Hatırlatamız, Aqmescit rayonınıñ Biy Tanış köyünde sentâbrniñ 4-nde saba Nariman Celâlnıñ evinde tintüv keçirildi, bundan soñ onı mavı Volkswagen mikroavtobusınen alıp kettiler. Qırımtatar Milliy Meclisiniñ reisi Refat Çubarov Nariman Celâl Qırım ve Aqyardaki Rusiye FSBsiniñ binasında buluna, dep yazdı Facebookta.
Çubarovnıñ fikirince, Qırımda sentâbrniñ 3-4-nde başlağan yañı tintüv ve apiske aluv dalğası, hususan qırımtatar faali Nariman Celâlnıñ tutuluvı, Rusiye akimiyetiniñ Ukraina tarafından teşkil etilgen «Qırım platformasınıñ» sammiti içün intiqam ola.
Ukraina prezidentiniñ Qırım Muhtar Cumhuriyetindeki daimi temsilciligi qırımtatar faali Nariman Celâlnıñ tutuluvını tefsir etip, Rusiye uquq qoruyıcılarınıñ «Qırımtatar Milliy Meclisiniñ vekillerini taqip etüvnen» bağlı adımlarını takbih etti.
Ukraina Yuqarı Radasınıñ İnsan aqları vekâletlisi Lüdmila Denisova sentâbrniñ 4-nde qırımtatar faali Nariman Celâlnıñ tutuluvını Telegramda yazıp, «Rusiye FSBsiniñ hadimleri işğal etilgen Qırımda sahte davalar esasında Ukraina vatandaşlarınıñ evlerine sürip kirmege devam ete», dep ayttı.
Ukraina Tış işler naziriniñ birinci muavini Emine Ceppar Qırım.Aqiqatqa vaziyetni tefsir etip, Qırımda Rusiye quvetçileriniñ areketlerini «siyasiy basqı» dep adlandırdı.
Ukraina prezidenti Volodımır Zelenskıy Qırımdaki tutuv ve tintüvler vastasınen «Rusiye «Qırım platformasına» cevap bere», dep qayd etti.
Ukraina aq qorçalayıcı teşkilâtları yarımadada tutulğan qırımtatarlarnı ortaq beyanatta azat etmege talap etti.
Sentabrniñ 4-nde gece qırımtatar areketiniñ faali Nariman Celâl, Aqmescit rayonınıñ Biy Tanış (Pervomayskoye) köyünde saat 1:00 civarlarında Rusiye polisiniñ hadimleri Aziz Ahtemovnıñ evini tintti, soñra ise Ahtemovnı belli olmağan yerge alıp ketti, dep yazdı Facebook saifesinde.
«Qırım birdemligi» cemaat birleşmesiniñ soñki malümatına köre, Rusiye quvetçileri işğal altındaki Qırımda sentâbrniñ 3-4-nde beş insannı tutıp aldı: Aziz Ahtemov, Asan Ahtem, Nariman Celâl, Eldar Odamanov, Şevket Useinovnı.
Nariman Celâl – qırımtatar siyasetçisi, oca, siyasetşınas ve jurnalist. 2013 senesinden başlap Qırımnıñ Rusiye tarafından işğal etilüvinden soñ Meclis faaliyeti yasaqlanğanına qadar Qırımtatar Milliy Meclis reisiniñ birinci muavini, informatsion-analitik bölüginiñ reberi.
